ރިއަލް މެޑްރިޑްގެ ތަރި ކިލިއަން އެމްބާޕޭ ވަނީ ބާސެލޯނާގެ ޒުވާން ކުޅުންތެރިޔާ ލަމިން ޔަމާލްގެ ދިފާއުގައި ނުކުމެ، މީޑިއާތަކުން އޭނާއާ ދެކޮޅަށް ކުރަމުންދާ ފާޑުކިޔުންތަކަށް ރައްދު ދީފައެވެ.

މިހާރު އުމުރުން 18 އަހަރުގެ ލަމިން ޔަމާލަކީ މިވަގުތު ދުނިޔޭގެ ފުޓްބޯޅައިގެ އެންމެ ފާހަގަކޮށްލެވޭ އެއް ކުލުންތެރިޔާއެވެ. ނަމަވެސް މީޑިއާތަކުން އޭނާގެ ދިރިއުޅުމުގެ ވާހަކަތައް ދައްކައި، އަމިއްލަ ދިރިއުޅުމަށް ވަރަށް ބޮޑަށް ފާޑުކިޔަމުން ދެއެވެ.

Ad by Hajj Corporation

މޮވިސްޓާއަށް ދެއްވި އިންޓަވިއުއެއްގައި އެމްބާޕޭ ވިދާޅުވީ "ލަމިން ޔަމާލްގެ އަމިއްލަ ދިރިއުޅުމާ ބެހޭ ގޮތުން މީހުން ވަރަށް ގިނައިން ވާހަކަ ދައްކާ. އަހަރެންގެ ޚިޔާލުގައި އޭނާއަށް އުނދަގޫ ނުކޮށް ދޫކޮށްލަން ވާނެ. ފުޓްބޯޅައިގައި އޭނާއަކީ ވަރަށް މޮޅު ކުޅުންތެރިއެއް، އެކަމަކު ދިރިއުޅުމުގައި އޭނާއަކީ އަދި 18 އަހަރުގެ ކުއްޖެއް،" ޔަމާލް އަށް މީޑިޔާތަކުން ކިޔާ ފާޑުކިޔުންތަކަށް ރައްދުދެމުން އެމްބާއްޕޭ ބުނެފައިވެއެވެ.

އެމްބާޕޭއަކީވެސް ޅަ އުމުރުގައި ފުޓްބޯޅައިގެ މައިދާނުގައި ފާހަގަކުރެވުނު ކުޅުންތެރިއެއް ކަމުން، ޔަމާލްގެ މިހާރުގެ ހާލަތާމެދު އޭނާއަށް ރަނގަޅަށް އެނގިވަޑައިގަންނަވާނެ ކަމަށް ބެލެވެއެވެ. އަދި މިފަދަ ހާލަތެއްގައި ހުރި ޒުވާން ކުޅުންތެރިއަކަށް ދޭންޖެހޭ އެއްބާރުލުމާއި ސަޕޯޓްގެ މުހިންމުކަން އެމްބާޕޭގެ މި ބަސްތަކުން ފާހަގަކޮށްދެއެވެ.

އެމްބާއްޕޭ މީޑިޔާގައި މިހެންބުނެފައިވާއިރު، ބާސެލޯނާއާއި ރެއާލް ވާދަކުރާ އެލް ކްލެސިކޯ މިމަހުގެ 26 ވަނަ ދުވަހުގައި މެޑްރިޑްގައި ކުޅެވޭނެއެވެ.