އަފްޣާނިސްތާނުގައި ވެރިކަންކުރާ ތާލިބާނުން ނުރުހުނަސް އެ ގައުމުގެ ރައްޔިތުންނަށް ތަޢުލީމީ އަދި އިންސާނީ އެހީތެރިކަން ފޯރުކޮށްދިނުމުގައި ޕާކިސްތާނުން ދެމިތިބޭނެކަމަށް ޕާކިސްތާނުގެ ރައީސް އާސިފް ޢަލީ ޒަރުދާރީ ވިދާޅުވެއްޖެއެވެ.

ޕާކިސްތާނާއި އަފްޣާނިސްތާނާދެމެދު ހަނގުރާމައިގެ ހާލަތެއް އުފެދިފައިވާއިރު، ޕާކިސްތާނުގެ ރައީސް އާސިފް ޢަލީ ޒަރުދާރީ ވިދާޅުވީ، ޕާކިސްތާނުގެ ޤައުމީ މަސްލަހަތާއި، ސަރަހައްދީ މިނިވަންކަމާއި ސަލާމަތަށް ރައްކާތެރިވުމަށް ޕާކިސްތާނުން ދެމިތިބޭނެ ކަމަށެވެ. އަދި އަފްޣާނިސްތާނުގެ ބިމުން ޕާކިސްތާނާ ދެކޮޅަށް ހަރަކާތްތެރިވާ ''ޓެރަރިސްޓުންނާ'' މެދު ފިޔަވަޅު އެޅުމަށް ރައީސް ޒަރުދާރީ ވަނީ ގޮވާލައްވާފައެވެ.

Ad by Hajj Corporation

ޕާކިސްތާނު ރައީސް ވިދާޅުވީ ތާލިބާނުން ނުރުހުނަސް އަފްޣާން ރައްޔިތުންނަށް އެ ގައުމުން އެހީތެރިވާނެއެވެ. ޚާއްޞަކޮށް ތަޢުލީމާއި އިންސާނީ އެހީތެރިކަން ފޯރުކޮށްދިނުން ކުރިއަށް ގެންދާނެކަމަށް އެމަނިކުފާނު ވަނީ ވިދާޅުވެފައެވެ.

ޕާކިސްތާނުން އަފްޣާނިސްތާނަށް ހަމަލާދިންކަމަށް ބުނެ އުފެދުނު ނުތަނަވަސްކަމުގައި ދެގައުމުގެ ބޯޑަރުގައި ހަމަލާ ބަދަލުކޮށްފައިވާއިރު، ޕާކިސްތާނުގެ މިލިޓަރީން ހާމަކުރި ގޮތުގައި ބޯޑަރުގައި ރޭގަނޑު ހިނގި ހަމަލާތަކުގައި 200 އަށްވުރެ ގިނަ ޓެލިބާން އަދި އެހެނިހެން ހަނގުރާމަވެރިން މަރާލެވިފައިވާ ކަމަށާއި، އެމީހުންގެ 23 ސިފައިން ޝަހީދުވެ، 20 ސިފައިންނަށް އަނިޔާވެފައިވެއެވެ. އަދި ޓެލިބާނުންގެ މަރުކަޒުތަކާއި، ކޭމްޕްތަކާއި، މައި އޮފީސްތަކާއި އަދި އެހީތެރިކަން ފޯރުކޮށްދޭ ވިއުގަތަކަށް ގެއްލުން ދެވިފައިވާ ކަމަށްވެސް ވަނީ ހާމަކޮށްފައެވެ.

އެހެންނަމަވެސް، އަފްޣާނިސްތާނުން ބުނެފައިވާ ގޮތުގައި މި ހަނގުރާމައިގައި ޕާކިސްތާނުގެ 58 ސިފައިން މަރާލެވިފައިވެއެވެ.

މި ހަމަނުޖެހުންތަކާ ގުޅިގެން ޤަޠަރާއި ސަޢޫދީ ޢަރަބިއްޔާއިން ވަނީ ބޯޑަރުގައި އިތުރުވަމުންދާ ހަމަނުޖެހުންތަކާމެދު ކަންބޮޑުވުން ފާޅުކޮށް، ހަމަޖެހުމަށް ގޮވާލާފައެވެ. އަދި އީރާނުން ބުނެފައިވަނީ މި ދެ ޤައުމުގެ ދެމެދުގައި އުފެދިފައިވާ ހަމަނުޖެހުން މަޑުޖައްސާލުމަށް އެހީތެރިވުމަށް ތައްޔާރަށް ތިބިކަމަށެވެ.