މެދުއިރުމަތީގެ ނުތަނަވަސްކަމާ ގުޅިގެން ތެލުގެ އަގު އިންތިހާއަށް އުފުލެމުންދާތީ، އޮޕަރޭޝަނަލް ޚަރަދުތައް އިތުރުވުމުން، އޭޕްރީލް 17 އިން ފެށިގެން ސެލަރުންގެ ފުލްފިލްމަންޓް ފީގެ އިތުރަށް 3.5 އިންސައްތައިގެ ފިއުލް އަދި ލޮޖިސްޓިކްސް ޗާޖެއް ނަގަން ފަށަށް އެމެޒޯން އިން ނިންމައިފިއެވެ.

އީ-ކޮމާސްގެ މި ބޮޑު ކުންފުނިން ބުރާސްފަތި ދުވަހު އެ ކުންފުނީގެ މާޗަންޓް ޕާޓްނަރުންނަށް ފޮނުވި ނޯޓިސްއެއްގައި ބުނެފައިވަނީ، މި ސާޗާޖު ނަގާނީ އެމެރިކާ އަދި ކެނެޑާގައި "ފުލްފިލްމަންޓް ބައި އެމެޒޯން" (އެފްބީއޭ) ފީތަކުން ކަމަށެވެ.

Ad by Hajj Corporation

މީގެ އިތުރުން، އެމެރިކާއިން ކެނެޑާ، މެކްސިކޯ އަދި ބްރެޒިލަށް ކުރާ ރިމޯޓް ފުލްފިލްމަންޓް ޚިދުމަތްތަކަށްވެސް މި ފީ ހިނގާނެއެވެ.

ފެބްރުއަރީ 28 ގައި އީރާނާ ދެކޮޅަށް ހަނގުރާމަ ފެށުމާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ.

އެމެރިކާގައި، ހަނގުރާމަ ފެށުނުތާ ހަތަރު ހަފުތާގެ ތެރޭގައި ކޮމަން ރީޓެއިލް ޕެޓްރޯލްގެ އަގު ގާތްގަނޑަކަށް 36 އިންސައްތަ ވަނީ މަތިވެފައެވެ.

މީގެ މަހެއްހާ ދުވަސް ކުރިން 2.98 ޑޮލަރަށް ހުރި ޕެޓްރޯލް ގެލަނެއްގެ އަގު މިހާރު ވަނީ 4.1 ޑޮލަރަށް އަރާފައެވެ.

ކަނޑުގެ ދަތުރުފަތުރުގެ މަގުތަކަށް ބުރޫއެރުމުގެ ސަބަބުން ޑީސަލްގެ އަގު ވަނީ މިއަށްވުރެ ވެސް ބޮޑަށް އުފުލިފައެވެ. އެގޮތުން ޑީސަލްގެ އަގު 46 އިންސައްތަ މަތިވެ، ގެލަނެއްގެ އަގު ވަނީ 5.5 ޑޮލަރަށް އަރާފައެވެ.

އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވީ މި ފަހަކަށް އައިސް ގައުމުގެ އެތެރޭގައި ޕެޓްރޯލްގެ އަގު އުފުލެމުންދާތީ ގިނަ އެމެރިކާ ރައްޔިތުން ތިބީ ކަންބޮޑުވެފައިކަމަށެވެ.

"މި ކުރު މުއްދަތުގެ އިތުރުވުމަކީ މުޅިންވެސް އީރާނުގެ ސަރުކާރުން، މި ހަމަނުޖެހުމާ އެއްވެސް ގުޅުމެއް ނެތް އަވަށްޓެރި ގައުމުތަކުގެ ވިޔަފާރި ތެޔޮ ޓޭންކަރުތަކަށް ދެމުންދާ ބިރުވެރި ޓެރަރިސްޓް ހަމަލާތަކުގެ ނަތީޖާއެވެ." އޭނާ ވިދާޅުވެފަވެއެވެ.