މިރޭ ކުޅޭ ޗެމްޕިއަންސް ލީގުގެ މެޗަށް ތައްޔާރުވުމަށް އާސެނަލްގެ އެމިރޭޓްސް ސްޓޭޑިއަމްގައި ކުރި ތަމްރީނު ސެޝަނަށްފަހު ހޫނުފެން ނުލިބުމާ ގުޅިގެން އެތްލެޓިކޯ މެޑްރިޑުން ޔުއޭފާއަށް ރަސްމީކޮށް ޝަކުވާއެއް ހުށަހަޅައިފިއެވެ.

ވިއްސާރަވެހޭ ދުވަހެއްގައި ލަންޑަންގައި ތަމްރީނު ކުރުމަށްފަހު، ދަނޑުގައި ހޫނުފެން ނެތުމުގެ ސަބަބުން ކުޅުންތެރިންނަށް ފެންވެރުމުގެ ފުރުސަތު ގެއްލިގެން ދިޔައެވެ. އެތްލެޓިކޯގެ ޓީމު ހަވީރު 5:30 ހާއިރު ދަނޑަށް އައުމާއެކު މި މައްސަލަ އާސެނަލްގެ މުވައްޒަފުންގެ ސަމާލުކަމަށް ގެނެވުނު ނަމަވެސް، ތަމްރީނު ނިމުނުއިރުވެސް މައްސަލަ ހައްލުނުވެއެވެ.

Ad by Hajj Corporation

އެމިރޭޓްސް ސްޓޭޑިއަމް ފަދަ ޒަމާނީ ދަނޑެއްގައި، ޚާއްސަކޮށް ޔުއޭފާގެ މުހިންމު މުބާރާތެއްގައި މިފަދަ އަސާސީ ވަސީލަތެއް ނެތުމާމެދު ސްޕެއިންގެ ޓީމުން ވަނީ ހައިރާންވެފައެވެ. މި ހާދިސާއާ ގުޅިގެން ކުޅުންތެރިންނާއި އޮފިޝަލުން ވަނީ ފެންވެރުމަށާއި މެޗަށް ތައްޔާރުވުމަށް އެމީހުންގެ ހޮޓަލަށް އެނބުރި ދާންޖެހިފައެވެ.

އާސެނަލްގެ ފެންވަރުގެ ސްޓޭޑިއަމެއްގައި މިފަދަ ކަމެއް ދިމާވުމަކީ ބަލައިގަނެވޭނެ ކަމެއް ނޫންކަމަށް ބުނެ އެތްލެޓިކޯއިން ވަނީ ޔުއޭފާއަށް ރަސްމީ ޝަކުވާއެއް ހުށަހަޅާފައެވެ.

އާސެނަލްއާއި އެތްލެޓިކޯ މެޑްރިޑް ބައްދަލުކުރާ މެޗު އޮންނާނީ މިރޭ ރާއްޖެގަޑިން 12:00 ގައި ލަންޑަނުގެ އެމިރޭޓްސް ސްޓޭޑިއަމްގައެވެ.