އަލީ ފާސިރު (ސެންޓޭ)ގެ ހެޓްރިކާ އެކު، 4-0 އިން ވާދަވެރި ވިކްޓްރީ ސްޕޯޓްސް ކްލަބް ބަލިކޮށް ނިއު ރޭޑިއަންޓް ސްޕޯޓްސް ކްލަބުން ދިރާގު ދިވެހި ޕްރިމިއާ ލީގުގެ ތާވަލުގެ އެއްވަނައަށް ޖެހިލައިފިއެވެ.

"ރަސްވާދަ" ގެ ނަމުން ކުޅުނު މި މެޗުގައި ސެންޓޭގެ ފަރާތުން ވަނި މޮޅުކުޅުމެއް ފެނިގެން ގޮސްފައެވެ. އެގޮތުން މެޗު ފެށިގެން 12 މިނިޓުގެ ތެރޭގައި ނިއު އިން ވަނީ 2 ލަނޑުޖަހާފައެވެ. މި ދެ ލަނޑު ވެސް ޖެހީ މެޗުގެ މޮޅު ކުޅުންތެރިޔާގެ މަގާމު ހޯދި ސެންޓޭއެވެ.

Ad by Hajj Corporation

މި މޮޅާއެކު ނިއު އިން ވަނީ ލީގުގެ އެއްވަނައަށް ޖެހިލާފައެވެ. އެއީ ދެވަނައިގައި އޮތް މާޒިޔާއާ އެއްވަރަށް ހަތަރު މެޗުން 12 ޕޮއިންޓް ހޯދައިގެންނެވެ. ނަމަވެސް ނިއު އަށް ކުރިލިބެނީ ލަނޑުގެ ތަފާތުންނެވެ. އެއީ މާޒިޔާއަށް ވުރެ ފައިދާ އެއް ގޯލު އިތުރުވުމުންނެވެ.

ސްލޮވާކިއާގެ ކޯޗު ޖޯޖްލީ ގެރީގެ އިރުޝާދުގެ ދަށުން ވިކްޓްރީން ކުޅުނު ފުރަތަމަ މެޗުގައި އެ ޓީމުން ގިނަ މައްސަލަތަކެއް ފެނިގެންދިޔައެވެ. މި މެޗުން ބަލިވުމާއެކު ވިކްޓްރީ އަށް ފުރަތަމަ ހަތަރު މެޗުން ލިބިފައިވަނީ އެންމެ ތިން ޕޮއިންޓެވެ. އެ ޓީމު މިހާރު އޮތީ ލީގުގެ ހަތްވަނައިގައެވެ.