ރަސްމީ ދަތުރުފުޅެއްގައި ހާރިޖީ ވަޒީރު ޑރ. އަބްދުﷲ ހަލީލް ވިއެޓްނާމަށް ވަޑައިގެންފިއެވެ.

ވަޒީރު ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ ވިއެޓްނާމްގެ ހަނޯއީއަސް މިހާރު ވަޑައިގެންފައިވާ ކަމަށެވެ.

Ad by Hajj Corporation

އެ ގައުމަށް ވަޒީރު ހަލީލް ވަޑައިގެންނެވީ ސައިބާ ކްރައިމާއި ދެކޮޅަށް ޔުނައިޑެޓް ނޭޝަންސްގެ ގައުމުތަކުން އެއްބަސްވުމެއްގައި ސޮއިކުރުމުގެ ރަސްމިއްޔާތެއްގައި ބައިވެރިވެވަޑައިގަތުމަށް ކަމަށެވެ. އަދި މީގެ އިތުރުންވެސް ރާއްޖެއިން އިސްކަންދޭ ދާއިރާތަކުން އިތުރަށް ގުޅުންބަދަހިކުރުމާ ގުޅޭގޮތުން ވިއެޓްނާމް ސަރުކާރުގެ ކަމާބެހޭ އިސް ފަރާތްތަކާ ބައްދަލުކޮށް މަޝްވަރާ ކުރެއްވުމަށް ހަމަޖެހިފައިވާ ކަމަށް ވަޒީރުގެ ޕޯސްޓުގައި ވަނީ ފާހަގަ ކުރައްވާފައެވެ.

އެ ދަތުރުފުޅުގެ ސަބަބުން ރާއްޖެއާއި ވިއެޓްނާމާއި ދެމެދު އޮތް ޒަމާންވީ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރައްވާ ކަމަށް ވަޒީރު ހަލީލް ވިދާޅުވިއެވެ.