މި ސަރުކާރުން ތައާރަފުކުރި ބަންކަރިން ހިދުމަތުން މިހާތަނަށް 192 މިލިއަން ރުފިޔާގެ އާމްދަނީއެއް އެސްޓީއޯއަށް ލިބިފައިވާކަމަށް އިގުތިސާދީ ތަރައްގީއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. 

ވަޒީރު މިފަދައިން ވިދާޅުވީ މަޖިލީހުގެ މިއަދުގެ ޖަލްސާގައި ކަނޑިތީމު ދާއިރާގެ މެންބަރު އަމީން ފައިސަލް ކުރެއްވި ސުވާލަށް ދެއްވި ޖަވާބުގައެވެ.

Ad by Hajj Corporation

2024 ވަނަ އަހަރުގެ ސެޕްޓެންބަރު މަހުގައި ފެށި ބަންކަރިން ހިދުމަތުން މިހާތަނަށް ލިބުނު އާމްދަނީއާއި އެ އާމްދަނީން ދައުލަތަށް ދައްކާފައިވާ ޓެކުހުގެ ބައެއް ތަފުސީލުތައް ހާމަކުރައްވަމުން ވަޒީރު ވިދާޅުވީ އޮކްޓޯބަރުމަހުގެ 27ގެ ނިޔަލަށް ބަންކަރިން ހިދުމަތުން އެސްޓީއޯއަަށް 192،149،939 (ސަަތޭކަ ނުވަދިހަ ދެ މިލިއަން އެއްލައްކަ ސާޅީސްނުވަހާސް ނުވަސަތޭކަ ތިރީސް ނުވަ) ރުފިޔާގެ އާމްދަނީއެއް ލިބިފައިވާކަމަށެވެ.

އަދި މި ހިދުމަތުން 17،360،589.10 ރުފިޔާ ޓެކުސްގެ ގޮތުގައި އެސްޓީއޯއިން ސަރުކާރަށް ދައްކާފައިވާކަމަށްވެސް ވަޒީރުވަނީ ވިދާޅުވެފައެވެ.

ބަންކަރިން ޚިދުމަތަކީ ރާއްޖޭގެ އިޤްތިޞާދު ސިންދަފާތުކޮށް ރާއްޖެއަށް ވަންނަ އާމްދަނީ އިތުރުކުރުމަށް ފަށާފައިވާ މަސައްކަތެކެވެ. މިދިޔަ އަހަރު ސެޕްޓެންބަރު މަހުން ފެށި މި ޚިދުމަތަކީ އޮފްޝޯކޮށް އެކަމަށް ޚާއްސަ ބޯޓެއް ގެނެސް އެސްޓީއޯ މެދުވެރިކޮށް ދޭ ޚިދުމަތެކެވެ.ބަންކަރިން ޚިދުމަތް ރާއްޖޭގައި ފެށީ ބައިނަލްއަޤްވާމީ ގޮތުން މި ޚިދުމަތް ދިނުމުގެ ތަޖުރިބާ ލިބިފައިވާ ވިޓޯލް ކުންފުންޏާއެކުއެވެ.

މި ޚިދުމަތް ފެށިފަހުން ޚިދުމަތް ހޯދާ މިންވަރު އިތުރުވެ، ލިބޭ ޖުމްލަ އާމްދަނީ ދަނީ އިތުރުވަމުންނެވެ.