މަނީ ލޯންޑްރިންގެ ކުށް ސާބިތުވެ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އިތުރު ފަސް އަހަރުގެ ޖަލު ހުކުމަކާއެކު، 154،000 ރުފިޔާގެ ޖޫރިމަނާއެއް މިއަދު ކޮށްފިއެވެ.

ފުޓްބޯލް އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ޚިޔާނާތްތެރިވެ، އިތުރު ކުށުގެ ޢަމަލުތައް ހިންގާކަމަށް ތުހުމަތުކުރެވޭ މައްސަލައިގައި ޖިނާއީ ދެ ދަޢުވާއެއް ޕްރޮސެކިއުޓަރ ޖެނެރަލްގެ އޮފީހުން ބައްސާމްގެ މައްޗަށް އުފުލާފައިވެއެވެ.

Ad by Hajj Corporation

މި މައްސަލައިގައި އޭނާގެ މައްޗަށް ހިޔާނާތުގެ ކުށް ސާބިތުވެ މިއަހަރުގެ އޮގަސްޓް މަހުގެ ތެރޭގައި ވަނީ ހަތަރު އަހަރުގެ ޖަލު ހުކުމެއް އިއްވާފައެވެ. މިއަދު އޭނާގެ މައްޗަށް ހުކުމް އިއްވާފައިވަނީ އެ ފައިސާ ލޯންޑާ ކުރިކަމުގެ ދައުވާ ސާބިތުވެގެންނެވެ.

މަނީ ލޯންޑްރިންގެ މައްސަލައިގައި ދައުލަތުން އެދިފައިވަނީ އެކުށުގެ އަދަބަކަށް 15 އަހަރުގެ ޖަލު ހުކުމަކާއެކު 50،000 ޑޮލަރުން ޖޫރިމަނާ ކުރުމަށެވެ. ނަމަވެސް ބައްސާމްގެ ފަރާތުން ވަނީ ލުއި އަދަބެއް ދިނުމަށް އެދިފައެވެ.

ކްރިމިނަލް ކޯޓުގެ ގާޒީ އިސްމާއިލް ޝަފީއު ކުރެއްވި ހުކުމުގައި ވަނީ އެފްއޭއެމްގެ ފައިސާ އަމިއްލަ އެކައުންޓަށް ޖަމާކޮށް ބައްސާމް ބޭނުންކޮށްފައިވާކަން ޝަރީއަތަށް ސާބިތުވާ ކަމަށެވެ. އެހެން ކަމުން އެ މައްސަލައިގައި އޭނާ 5 އަހަރަށް ޖަލަށްލުމާއެކު 154،000 ރުފިޔާއިން ޖޫރިމަނާ ކުރުމަށް ގާޒީ ވަނީ ހުކުމް ކޮށްފައެވެ.