މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ)އިން މި އަހަރުގެ މިހާތަނަށް، 210 ޕްރޮގްރާމެއް އެކްރެޑިޓްކޮށްދީފައިވާ ކަމުގައި ހަޔާ އެޑިއުކޭޝަން މިނިސްޓްރީން ބުނެފިއެވެ.

ހަޔާ އެޑިއުކޭޝަން މިނިސްޓްރީގެ ދަށުން ހިންގަމުން އަންނަ އެމްކިއުއޭގެ މަސައްކަތްތަކާ ގުޅޭ ގޮތުން އެ ވުޒާރާއިން މިއަދު ނެރުނު އިއުލާނެއްގައި ބުނީ، އެމްކިއުއޭއިން އަންނަނީ މަތީ ތައުލީމު ދޭ މަރުކަޒުތަކުން ކުރިޔަށް ގެންދިއުމަށް ހުށައަޅާ މަތީ ތައުލީމުގެ ޕްރޮގްރާމްތައް އެމްއެންކިއުއެފް( މޯލްޑިވްސް ކޮލިފިކޭޝަން ފްރޭމްވޯކް) އަށް ފެތޭތޯ ބަލައި، ފެތޭނަމަ އެކްރެޑިޓް ކޮށްދެމުންކަމަށެވެ.

އެގޮތުން މި އަހަރުގެ އޮގަސްޓު މަހުގެ ނިޔަލަށް މަތީ ތައުލީމު ފޯރުކޮށްދޭ މަރުކަޒުތަކުން 227 ޕްރޮގްރާމެއް އެކްރެޑިޓް ކުރުމަށް ހުށަހަޅާފައިވާއިރު އޭގެ ތެރެއިން 210 ޕްރޮގްރާމެއް ވަނީ އެކްރެޑިޓް ކޮށްދީފައިވާ ކަމަށް އެ ވުޒާރާއިން ބުންޏެވެ. އަދި ބަކީ ހުރި 17 ޕްރޮގްރާމްގެ މަސައްކަތްތައް މިހާރު ކުރަމުންދާ ކަމަށް ވެސް އެ ވުޒާރާއިން ބުންޏެވެ.

ރާއްޖޭގެ މަތީ ތައުލީމުގެ ފެންވަރު ރަނގަޅުކޮށް، ރާއްޖޭގެ ޔުނިވާސިޓީތަކަކީ ބޭރުގެ ދަރިވަރުން އައިސް ތައުލީމް އުނގެނޭނެ ފެންވަރުގެ ތަންތަނަށް ހެދުމަކީ މި ސަރުކާރުގެ އަމާޒެކެވެ. އެހެންކަމުން ރާއްޖޭގައި މަތީ ތައުލީމުގެ ފެންވަރު ރަނގަޅުކުރުމަށް ކުރެވެން ހުރި މަސައްކަތްތައް ކުރަމުން އަންނަ ކަމަށް އެ ވުޒާރާއިން ބުންޏެވެ.