ފަނޑިޔާރުންނަކީ ތިމާގެ އުޅުންތަކާއި ގުޅުންތަކުގައި އެހެން އެންމެންނަށް ނަމޫނާ ދައްކަންޖެހޭ ބައެއްކަމަށް، އުއްތަމަ ފަނޑިޔާރު އަލްއުސްތާޛް ޢަބްދުލް ޣަނީ މުޙައްމަދު ވިދާޅުވެއްޖެއެވެ.

އުސްތާޛް ޣަނީ މިފަދައިން ވިދާޅުވެފައިވަނީ ކްރިމިނަލް ކޯޓަށާއި މެޖިސްޓްރޭޓް ކޯޓުތަކަށް ފަނޑިޔާރުން ޢައްޔަނުކުރެއްވުމަށް ދިވެހިރާއްޖޭގެ ސުޕްރީމްކޯޓުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

Ad by Hajj Corporation

މި ޙަފްލާގައި ވާހަކަދައްކަވަމުން އުސްތާޛް ޣަނީ ވިދާޅުވީ ފަނޑިޔާރުކަމަކީ ވަރަށް މަތިވެރި މަސްއޫލިއްޔަތެއް ކަމަށާއި ކޮންމެ ފަނޑިޔާރެއްގެވެސް އަޒުމަކަށް ވާން ވާނީ މި މަތިވެރި މަސްއޫލިއްޔަތު، ތެދުވެރިކަމާއި އަމާނާތްތެރިކަމާއެކު އަދާކުރުންމަތީ ދެމިތިބުން ކަމަށެވެ. އަދި މި މަތިވެރި ޒިންމާ އަދާކުރުމަށް ﷲ ތަޢާލާ އަންގަވާފައި ވަނީވެސް އެގޮތުގެ މަތީންކަން ހަނދުމަކޮށްދެއްވާ، މިކަމުގައި ފަރުވާކުޑަ ނުކުރުމަށް އުއްތަމަ ފަނޑިޔާރު ގޮވާލެއްވިއެވެ.

ހަމައެހެންމެ، ފަނޑިޔާރުންނަށް އިޙްތިރާމް ލިބުން ބިނާވެގެންވަނީ އެ ފަނޑިޔާރަކު ކޯޓުތެރޭގައްޔާއި ކޯޓުން ބޭރުގައި އަމަލުކުރާ ގޮތެއްގެ މައްޗަށްކަން ފާހަގަކުރައްވާ، ފަނޑިޔާރުންގެ އަމަލުތައް އަބަދުވެސް ބަހައްޓަންވާނީ ރިވެތި އަޚްލާޤެއްގެ އިތުރުން އަދަބުވެރި މިންގަނޑެއްގެ ތެރޭގައިކަމަށް އުއްތަމަ ފަނޑިޔާރު ވިދާޅުވިއެވެ.

މީގެ އިތުރުން، ފަނޑިޔާރުންނަކީ ތިމާގެ އުޅުންތަކާއި ގުޅުންތަކުގައި އެހެން މީހުންނަށް ނަމޫނާ ބަޔަކަށް ވާންޖެހޭނެކަން ފާހަގަކުރައްވާ، ކޯޓުތަކުގެ މުވައްޒަފުންނަށާއި ޚިދުމަތް ހޯދަން އަންނަ އެންމެންނަށްވެސް ނަމޫނާ ބަޔަކަށް ފަނޑިޔާރުންވުމަށް އުއްތަމަ ފަނޑިޔާރު ގޮވާލެއްވިއެވެ.

މި ރަސްމިއްޔާތުގައު ވާހަކަދައްކަވަމުން އުސްތާޛް ޣަނީ ވަނީ، އަދުލު އިންސާފު ޤާއިމުކުރުމަކީ އިލާހީ ރިސާލަތުގެ މައިގަނޑު އަސާސްކަމަށް ވިދާޅުވެ، މިއީ އެއްވެސް ހާލެއްގައި އާދައިގެ ޒިންމާއެއްގެ ގޮތުގައި ނުދެކުމަށް ފަނޑިޔާރުންނަށް ނަސޭހަތްތެރިވެވަޑައިގެންފައެވެ.

މި ރަސްމިއްޔާތުގައި ކްރިމިނަލް ކޯޓުގެ ޤާޟީކަމަށް ޢައްޔަނުކުރެއްވި 2 ފަނޑިޔާރުން ހިމެނިވަޑައިގަންނަވާގޮތަށް 19 ބޭފުޅަކު، ފަނޑިޔާރުކަމުގެ ހުވާކުރައްވާފައިވެއެވެ.