ހުޅުމާލެއާއި މާލެއާ ދެމެދު ދަތުރުކުރުމަށް އޮންނަ ހައިވޭގައި ދެ ކާރު ޖެހި އެކްސިޑެންޓެއް ހިނގައިފިއެވެ.

ފުލުހުންގެ މީޑީއާ އޮފިސަރު ވިދާޅުވީ، ހައިވޭގައި، ހުޅުމާލެއިން މާލެއަށް ދަތުރުކުރާ ފަޅީގައި ދެ ކާރު ޖެހި އެކްސިޑެންޓެއް ހިނގައިގެން މިއަދު ހަވީރު 04:00 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.

Ad by Hajj Corporation

މި އެކްސިޑެންޓު ހިނގާފައި ވަނީ އޭގެ ތެރެއިން އެއް ކާރު އޯވަޓޭކްކުރަން އުޅުމުގެ ތެރޭގައި ކަމަށް ވެސް އޮފިސަރު ވިދާޅުވިއެވެ.

އަދި އެކްސިޑެންޓުގައި އެއްވެސް މީހަކަށް އަނިޔާއެއް ވެފައި ނުވާކަމަށާއި އެހެންނަމަވެސް ދެ ކާރަށް ވެސް ގެއްލުންތަކެއް ލިބިފައިވާކަމަށް އޮފިސަރު ވިދާޅުވިއެވެ.

މި އެކްސިޑެންޓާ ގުޅިގެން އިތުރަށް ބަލަން ޖެހޭ ކަންކަން ބަލަމުން އަންނަކަމަށް އޮފިސަރު ވިދާޅުވިއެވެ.

މިއަދު ވެސް ހައިވޭގައި އެކްސިޑެންޓެއް ހިނގާފައިވާއިރު، ސިނަމާލެ ބްރިޖު ހައިވޭ މަތިން ހުކުރު ދުވަހުގެރޭ ހިނގި އެކްސިޑެންޓެއްގައި ސައިކަލެއް ދުއްވަން އިން މީހަކަށް އަނިޔާވެ، އޭނާއަށް އައިޖީއެމް ހޮސްޕިޓަލުގައި ފަރުވާދީފައިވެއެވެ. އެއީ 57 އަހަރުގެ ދިވެހި ފިރިހެނެކެވެ.

ފުލުހުން ބުނީ، މި އެކްސިޑެންޓް ހިނގާފައި ވަނީ ހުޅުމާލެއިން މާލެއަށް ދަތުރުކުރި ސައިކަލެއް، ބްރިޖް ލައިޓަށް މަޑުކޮށްގެން އޮތް ޕިކަޕެއްގެ ފަހަތުގައި ޖެހިގެން ކަމަށެވެ.