ދިވެހިރާއްޖޭގެ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ނަޞްރުގެ ދުވަހުގެ ތަހުނިޔާ އެންމެހާ ދިވެހީންނަށް ފޮނުއްވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސް ޑރ. މުޢިއްޒު ވިދާޅުވީ، 1988 ވަނަ އަހަރުގެ ނޮވެންބަރު 3 ގައި މި ޤައުމު ދިފާޢުކޮށްދިން ހިތްވަރުގަދަ ދަރީން ސާބިތުކޮށްދިނީ، އަލިރަސްގެފާނާއި ބޮޑުތަކުރުފާނާއި ދޮންބަންޑާރައިން ފަދައިން، މި ޤައުމުގެ ސިޔާދަތާއި މިނިވަންކަން އިސްކޮށް، ޤައުމު ގޮވައިލި ކޮންމެ ވަގުތަކު ހިތާއި ރޫޙުން އިޖާބަދޭން ތިބި ފަހުލަވާނުން މި ފަސްގަނޑުގައި އަބަދުމެ ތިބޭނެކަން ކަމަށެވެ. އަދި، މާދަމާގެ އުފާ ފާގަތިކަމަށް ދިވެހީންކުރާ އުންމީދުތަކުގައި ކުލަ ޖައްސައިދޭނީ، ކޮންމެ ދާއިރާއަކުންވެސް ވަޠަނުގެ ކުރިއެރުމާއި މަޞްލަޙަތަށް އިސްކަންދީ، މުރާލިކަމާއެކު ޚިދުމަތް ކުރާނޭ އިޚްލާޞްތެރީންކަމަށް ވިދާޅުވެ، ރައީސް ވަނީ މިފަދަ އަގުހުރި ދަރީން މި ޤައުމުގައި ގިނަކޮށްދެއްވުން އެދިވަދައިގެން ދުޢާކުރައްވާފައެވެ.

Ad by Hajj Corporation

ދުވަހުގެ މުނާސަބަތުގައި އެމަނިކުފާނުގެ އަނބިކަނބަލުން ކުރެއްވި ޕޯސްޓުގައި ވިދާޅުވެފައިވަނީ، މިދުވަސް ސާބިތުކޮށްދެނީ ދިވެހީންގެ ކެރުމާއި ހިތްވަރު ކަމަށާއި ޤައުމަށާއި ދީނަށް އޮތް ލޯތްބާއި ވަފާތެރިކަން ކަމަށެވެ. އަދި، ޖާނާއި ލެއިން ޤުރުބާންވާން ތިބި ޢަޒުމު ވަރުގަދަ ދަރީން އަބަދުވެސް މި ފަސްގަނޑުގައި ތިބޭނެކަމާއި ދިވެހީންނަކީ ޤައުމީ ކޮންމެ ކަމެއްގައި އީމާންތެރި އެއްބައިވަންތަ ބަޔެއްކަންވެސް މިދުވަސް ބުނެދޭކަމަށް، އެކަމަނާގެ ޕޯސްޓުގައި ވިދާޅުވިއެވެ.

ކޮންމެ އަހަރެއްގެ ނޮވެމްބަރު މަހުގެ ތިންވަނަ ދުވަސް ނަޞްރުގެ ދުވަހުގެ ގޮތުގައި ފާހަގަކުރަނީ، ދިވެހީންގެ ތެރެއިން ޤައުމަށް ޣައްދާރުވި ބަޔަކާއި ސްރީލަންކާގެ ނިރުބަވެރި ޖަމާޢަތެއް ގުޅިގެން 1988 ވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ދިން ޢުދުވާނީ ޙަމަލާއިން ނަޞްރު ލިބުން ފާހަގަކުރުމުގެ ގޮތުންނެވެ.