އަންނަ އަހަރު ބާއްވާ ވޯލްޑް ކަޕަށް ކޮލިފައިވުމުގެ ޖާގަ ޕޯޗުގަލް އިން ކަށަވަރުކޮށްފިއެވެ. މި ކާމިޔާބީ ހޯދާފައިވަނީ ކޮލިފައިންގެ ފަހުމެޗުގައި ރޭގައި އަރުމީނިއާ އަތުން 9-1 ގެ ބޮޑު ތަފާތަކުން މޮޅުވެގެންނެވެ. މި މެޗުގައި ބްރޫނޯ ފެނާންޑޭޒް އާއި ޖޯއާއޯ ނޭވޭސް ވަނީ ހެޓްރިކް ހަދައިފައެވެ.

މިދިޔަ ބުރާސްފަތި ދުވަހު ރިޕަބްލިކް އޮފް އަޔަލެންޑް އަތުން 2-0 ގެ ނަތީޖާއަކުން ބަލިވުމުގެ ސަބަބުން ގްރޫޕް އެފްގެ އެއްވަނަ ޖާގަ ކަށަވަރުކުރުން ޕޯޗުގަލްއަށް ލަސްވިއެވެ. އެ މެޗުގައި ރަތް ކާޑު ދެއްކުމާ ގުޅިގެން ކްރިސްޓިއާނޯ ރޮނާލްޑޯ މި މެޗުގައި ސަސްޕެންޑްވެފައިވީ ނަމަވެސް، ކޯޗު ރޮބާޓޯ މާޓިނޭޒްގެ ޓީމުން ވަނީ ރޮނާލްޑޯ ނެތިވެސް މޮޅު ކުޅުމެއް ދައްކާފައެވެ. ފުރަތަމަ ހާފް ނިމުމުގެ ކުރިން ޕޯޗުގަލްއިން ވަނީ ފަސް ގޯލު ޖަހާފައެވެ.

Ad by Hajj Corporation

މިމެޗުގައި ހެޓްރިކްހެދި ފެނާންޑޭޒް އާއި ނެވޭސްގެ އިތުރުން ދެން ގޯލުޖަހާފައިވަނީ ވެއިގާ އާއި ރާމޯސްގެ އިތުރުން ކޮންސިއެންސާއޯއެވެ.

މި ނަތީޖާއާއެކު ޕޯޗުގަލް ވަނީ ގްރޫޕް އެފްގެ އެއްވަނަ ޖާގަ ތިން ޕޮއިންޓުގެ ތަފާތަކުން ހޯދައި، ވޯލްޑް ކަޕަށް ޖެހިޖެހިގެން ހަތްވަނަ ފަހަރަށް ކޮލިފައިވެފައެވެ.