ސްޕެއިންގެ އުތުރުގެ ބާސްކް ކަންޓްރީ (ބިލްބާއޯ) ގައި ހޮނިހިރު ދުވަހު ފަލަސްތީނުގެ ފުޓުބޯޅަ ކުޅުންތެރިންގެ ޓީމަކުން ކުޅުނު މެޗުގައި މުޅު ދަނޑު ފުރާލައި ފަލަސްޓީނަށް އޮތް ލޯބި ދައްކާލައިފިއެވެ. މިމެޗު އިންތިޒާމުކުރި ފަރާތްތަކުން ބުނި ގޮތުގައި މި މެޗު ބެލުމަށް ގާތްގަނޑަކަށް 50،000 ބެލުންތެރިން ދަނޑަށް ވަދެފައިވެއެވެ.

ފަލަސްތީނުގެ ފުޓުބޯޅަ ކުޅުންތެރިންގެ ޓީމަކާއި، ބާސްކް ކަންޓްރީގެ ސްޕެއިން ކުޅުންތެރިންގެ ގްރޫޕަކާ ދެމެދު މި ރަޙުމަތްތެރި މެޗު ކުޅުނީ ޑޮކްޓަރސް ވިތްއައުޓް ބޯޑަރސް (އެމް.އެސް.އެފް) އަށް ފައިސާ ހޯދުމުގެ ހެޔޮކަމުގެ މަޤްސަދުގައެވެ.

Ad by Hajj Corporation

މި މެޗު ބެލުމަށް އައި ގިނަ ފަރާތްތަކުން ވަނީ ފަލަސްތީނުގެ ދިދަތަކާއި، އުތުރުގެ ބާސްކް ކަންޓްރީ ސަރަހައްދުގެ ދިދަތައް ނަގައިގެން ފަލަސްޠީނަށް އޮތް ލޯބި ދައްކާލާފައެވެ. މީގެ އިތުރުން، މެޗުގެ ކުރިން އެތައް ހާސް ބަޔަކު ވަނީ ދިދަ ހިފައިގެން ހިނގާލުންތަކެއް ވެސް ބާއްވާފައެވެ. މީގެ ކުރިންވެސް ސްޕެއިންގައި ވަނީ އިޒްރޭލުން ޣައްޒާއަށް ދެމުންދާ އަސްކަރީ ހަމަލާތަކާ ދެކޮޅަށް ބޮޑެތި މުޒާހަރާތައް ކުރިއަށް ގެންގޮސްފައެވެ. ސެޕްޓެމްބަރު މަހު ސްޕެއިން ވުއެލްޓާގައި އިޒްރޭލަށް ނިސްބަތްވާ ސައިކަލް ޓީމަކާ ދެކޮޅަށް ބޭއްވި ބޮޑެތި މުޒާހަރާތަކުގެ ތެރެއިން ފުރަތަމަ މުޒާހަރާ ބޭއްވީ ވެސް ބިލްބާއޯގައެވެ.

ބާސްކް ޓީމުގައި ހިމެނުނީ އެތްލެޓިކް އަދި ރެއާލް ސޮސިއެޑާޑްގެ ކުޅުންތެރިންގެ އިތުރުން އެހެން ޕްރޮފެޝަނަލް ކްލަބްތަކުގެ ކުޅުންތެރިންނެވެ. ސްޕެއިންގެ ގައުމީ ޓީމުގެ އެއްވެސް ކުޅުންތެރިއަކު މި މެޗުގައި ބައިވެރިވެފައެއް ނުވެއެވެ.