މާލެ ސަރަހައްދުގައި ގާއިމްކޮށްފައިވާ އާބަން ޕްރައިމަރީ ހެލްތުކެއާ ސެންޓާ (ޔޫޕީއެޗްސީ) ގެ މާފަންނު ބްރާންޗުން ހިދުމަތްދޭނެ ގަޑިތައް އާންމުކޮށްފިއެވެ.

މި މަހުގެ 19 ވަނަ ދުވަހު ރައީސް ޑރ. މުހައްމަދު މުއިއްޒު ވަނީ މާލެ ސަރަހައްދުގައި ގާއިމްކޮށްފައިވާ އާބަން ޕްރައިމަރީ ހެކްތްކެއާ ސެންޓާގެ މާފަންނު ބްރާންޗް ރަސްމީކޮށް ހުޅުވައްދެއްވާފައެވެ.

Ad by Hajj Corporation

އާބަން ޕްރައިމަރީ ހެލްތްކެއާގެ އަމާޒަކީ ދުޅަހެޔޮ މުޖްތަމައެއް ބިނާކުރުމަށް ބޭނުންވާ އާންމު ސިއްހީ މައުލޫމާތު ފޯރުކޮށްދިނުމާއި ރައްޔިތުންގެ ސިއްހަތު ދުޅަހެޔޮ ހާލަތެއްގައި ބަހެއްޓުމަށް ބޭނުންވާ މެޑިކަލް ޗެކަޕްތައް ހެދުމާއި އާންމު ބަލިތަކަށް ބޭސްފަރުވާ ކުރުމުގެ ހިދުމަތްތައް ދިނުން ކަމަށް އައިޖީއެމްއެޗްއިން ވިދާޅުވިއެވެ.އެ ހިދުމަތްތަކުގެ އިތުރުން އެހެނިހެން ތަފާތު ސިއްހީ ހިދުމަތްތައް އެ ސެންޓަރުގެ ތިން ކްލިނިކުން ފޯރުކޮށްދޭނެ ކަމަށް ވެސް ވިދާޅުވެފައިވެއެވެ.

އައިޖީއެމްއެޗްއިން ވަނީ އެ ސެންޓަރުން ހިދުމަތް ދޭން ފަށާނީ މި މަހުގެ 22 ވާ ހޮނިހިރު ދުވަހުން ފެށިގެން ކަމަށް ބުނެފައެވެ. އެ ސެންޓަރުން ހިދުމަތްދޭނެ ގަޑިތަކަކީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ރޭގަނޑު 10:00 އަށް އަދި ހުކުރު ދުވަހު މެންދުރުފަހު 3:30 އިން ރޭގަނޑު 10:00 އަށް ށެވެ. އަދި ސަރުކާރު ބަންދު ދުވަސްތަކުގައި ސެންޓަރު ވެސް ބަންދު ވާނެއެވެ.

އައިޖީއެމްއެޗްއިން ބުނީ އެ ސެންޓަރުގެ ޖީޕީ ކްލިނިކުން އާއިލާ ބޭސްވެރިކަމުގެ ހާއްސަ ޑޮކްޓަރުގެ ހިދުމަތާއި އާންމު ބަލިތަކަށް ފަރުވާ ދިނުމުގެ ހިދުމަތާއި ޖީޕީގެ ޑޮކްޓަރުން ލަފާ ދެއްވާ ލޭގެ ޓެސްޓްތައް ހެދުމުގެ ހިދުމަތް ދޭނެ ކަމަށެވެ. އަދި ޑްރޮޕް ބޮކްސް މެދުވެރިކޮށް ބޭސް ސިޓީ އާކުރުމުގެ ހިދުމަތާއި އެކްސްރޭގެ ހިދުމަތުގެ އިތުރުން ބޭސްފިހަރާއިގެ ހިދުމަތް ވެސް އެތަނުން ދޭނެ ކަމަށް އައިޖީއެމްއެޗް އިން ވަނީ ބުނެފައެވެ.

އޭގެ އިތުރުން އެ ކްލިނުކުން ކުޑަކުދިންގެ ހެދިބޮޑުވާ މިންގަނޑު ދެނެގަތުމާއި ވެކްސިން ދިނުމުގެ ކަންކަން ވެސް ކޮށްދޭނެ ކަނަށް އައިޖީއެމްއެޗްއިން ބުނެފައިވެއެވެ.