އިންޑިއާގެ އަހުމަދާބާދުގައި ހުންނަ އީކޭއޭ އެރީނާގައި މިއަދު ކުޅުނު އޭއެފްސީ ޔޫ-17 އޭޝިއަން ކަޕް 2026 ކޮލިފައިންގ މުބާރާތުގެ ފުރަތަމަ މެޗުގައި އިންޑިއާ އާއި ފަލަސްތީނު 1-1 ގެ ނަތީޖާއަކުން އެއްވަރުވެއްޖެއެވެ.

ޗައިނީޒް ޓައިޕޭ، ލެބަނަން އަދި އިރާނާއެކު ގްރޫޕް ޑީގައި ހިމެނޭ އިންޑިއާއަށް މި މެޗަކީ ކޮލިފައިވުމުގެ މަގު ފަހިކުރުމަށް ލިބުނު ރަނގަޅު ފުރުސަތެކެވެ. އިންޑިއާ އަށް ލަނޑު ޖަހައިގެން ކުރި ހޯދުނީ ފުރަތަމަ ހާފު ނިމުމާ ގާތްވެފައި ވަނިކޮށެވެ. 45 ވަނަ މިނެޓުގައި އަޒްލާން ޝާހް ނެގި ރަނގަޅު ކޯނަރެއް ޕެނަލްޓީ އޭރިއާ ތެރެއަށް އައުމުން، ޑިފެންޑަރު ޝުބަމް ޕޫނިއާ ވަނީ ބޮލުން ގޯލަށް ފޮނުވާލާފައެވެ. މި ހަމަލާ ފަލަސްތީނުގެ ކުޅުންތެރިއެއްގެ ގައިގައި ޖެހި، ގޯލުގެ ދަނޑީގައި ޖެހިފައި ގޯލަށް ވަދެގެންދިޔައީ އިންޑިއާ ވަނީ 1-0 ގެ ލީޑެއް ހޯދާފައެވެ.

Ad by Hajj Corporation

ފަލަސްތީނަށް އެއްވަރުކުރެވުނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އަމީރު ޖޯމާ އިންޑިއާގެ ގިނަ ޑިފެންޑަރުންތަކެއް ކައިރިން ނައްޓާލުމަށްފަހު ގޯލުގެ ދުރު ކަނަށް ފޮނުވާލި ތިރި ހަމަލާއަކުންނެވެ. މި ހަމަލާ ގޯލަށް ވަންއިރު ގޯލްކީޕަރު ރާޖްރޫޕް ސަރުކާރަށް އެއްވެސް ކަމެއް ނުކުރެވުނެވެ.

އަންނަ އަހަރު ސައުދީ އަރަބިއްޔާގައި ބާއްވާ އޭއެފްސީ ޔޫ-17 އޭޝިއަން ކަޕަށް ކޮލިފައިވާނީ ހަމައެކަނި ގްރޫޕްތަކުގެ އެއްވަނަ ހޯދާ ހަތް ޓީމު ކަމަށްވާއިރު، އިންޑިއާ އަށް މި ފެށުމަށްފަހު ކުރިއަށް ދިއުމަށް އިތުރު މަސައްކަތްތަކެއް ކުރަން ޖެހޭނެއެވެ.