މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބޯޑަށް، 18 ވަނަ ރައްޔިތުންގެ މަޖިލީހުގެ ގެމަނަފުށި ދާއިރާގެ މެންބަރު ޖަމީލް އުސްމާން މިއަދު އައްޔަންކުރައްވައިފިއެވެ.

ޖަމީލަކީ ރާއްޖޭގެ ސިޔާސީ މައިދާނާއި، ކުންފުނިތަކުގެ މެނޭޖްމަންޓް ދާއިރާގައި ފުޅާ ތަޖުރިބާ ހުރި ބޭފުޅެކެވެ. 18 ވަނަ ރައްޔިތުންގެ މަޖިލީހުގައި ގެމަނަފުށި ދާއިރާ ތަމްސީލުކުރެއްވި ދުވަސްވަރު، އޭނާ ވަނީ މަޖިލީހުގެ މާލިއްޔަތު ކޮމެޓީ، އިގުތިސާދީ ކޮމެޓީ އަދި ގައުމީ ސަލާމަތު ކޮމެޓީފަދަ ގިނަ ކޮމިޓީތަކެއްގައި ހަރަކާތްތެރިވެވަޑައިގެންފައެވެ.

Ad by Hajj Corporation

ސަރުކާރު ކުންފުނިތަކާއި އަމިއްލަ ބޮޑެތި ކުންފުނިތަކުގައި މެނޭޖްމަންޓް ލެވެލްގައި ވެސް ޖަމީލް ވަނީ މަސައްކަތް ކުރައްވާފައެވެ. ޚާއްސަކޮށް، ޓްރާންސް މޯލްޑިވިއަން އެއާވޭސް (ޓީއެމްއޭ) ގެ ސީނިއާ މެނޭޖްމަންޓުގައި ފަސް އަހަރު ދުވަހު އޭނާ ވަނީ ހިދުމަތް ކުރައްވާފައެވެ.

އިގިރޭސިވިލާތުގެ ބެޑްފޯޑްޝިއާ ޔުނިވާސިޓީން ބިޒްނަސް އެޑްމިނިސްޓުރޭޝަނުން މާސްޓާސް ހާސިލުކުރައްވާފައިވާ ޖަމީލަކީ ،އިނގިރޭސިވިލާތުގެ ޔުނިވާސިޓީ އޮފް ބާމިންހަމް އިން ބީއޭ (އޮނާސް) އިން ހޮސްޕިޓަލިޓީ އެންޑް ޓުއަރިޒަމް މެނޭޖްމަންޓް ހާސިލުކުރައްވާފައިވާ ބޭފުޅެކެވެ.

އިކޮނޮމިކް މިނިސްޓްރީގެ ބިޒްނަސް ޕޯޓަލްގައިވާ ގޮތުން، އެމްއޭސީއެލްގެ ބޯޑު މެންބަރުންގެ ގޮތުގައި މިހާރު ތިއްބެވީ އެ ކުންފުނީގެ ޗެއާޕާސަން އައިޝާ ނޫރައިން ޖަނާހު، މެނޭޖިން ޑިރެކްޓަރު އިބްރާހިމް ޝަރީފު، މުހައްމަދު ސަހާ ވަހީދު، އިބްރާހިމް ސިޔާދު ގާސިމް، މުހައްމަދު މިހާދު، މުޖުތަބާ ލަތީފް އަދި އިބްރާހިމް މަހުދީއެވެ.