ހައިވޭގައި ނުރައްކާތެރި އެކްސިޑެންޓެއް ހިނގާ، އަނިޔާ ލިބުނު ދެ މީހަކަށް އައިޖީއެމްއެޗުގައި ފަރުވާދޭން ފަށައިފިއެވެ.

ދިވެހި ފުލުހުންގެ ޚިދުމަތުން ބުނީ، ހައިވޭއިން ހުޅުމާލެއަށްދާ ލޭން ނިމޭ ހިސާބުގައި ސައިކަލަކާއި ޕިކަޕެއް ޖެހިގެން އެކްސިޑެންޓެއް ހިނގަފައިވާކަމުގެ މައުލޫމާތު މިއަދު ހެނދުނު 9 ޖެހިއިރު ލިބިފައިވާކަމަށެވެ. މިއެކްސިޑެންޓުގައި އަނިޔާވެފައިވަނީ ސައިކަލު ދުއްވަން އިން ޢުމުރުން 28 އަހަރުގެ ދިވެހި ފިރިހެނަކާއި ސައިކަލުގެ ފަހަތުގައި އިން 22 އަހަރުގެ އަންހެނަކަށްކަމަށް ފުލުހުން ބުނެއެވެ.

މި ދެމީހުންނަށްވެސް އައިޖީއެމްއެޗްގައި ދަނީ ފަރުވާދެމުންނެވެ. އަނިޔާ ލިބުނު ފިރިހެން މީހާގެ ކަނާތު ކޮނޑުހުޅު ނެއްޓި، އޭނާއަށް އެކިވަރުގެ އަނިޔާވެފައިވެއެވެ. އަންހެން މީހާގެ ގައިގެ އެކި ތަންތަން މަށައިގެންގޮސް އެކިވަރުގެ އަނިޔާ ލިބިފައިވެއެވެ.

ފުލުހުން އަންނަނީ މިހާދިސާ އިތުރަށް ތަހުގީގުކުރަމުންނެވެ.