ތޫފާނާއި ގުޅިގެން ކުރިއަށް އޮތް 24 ގަޑިއިރު އެކި ހިސާބަށް ވިއްސާރަކުރާނެ: މެޓް އޮފީސް
29 ނޮވެމްބަރު 2025 - 10:29

ރާއްޖޭގެ ކައިރިން އުފެދިފައިވާ "ޑިޓުވާ" ތޫފާނުގެ އަސަރު ކުރިއަށް އޮތް 24 ގަޑިއިރު ރާއްޖޭގެ އެކި ހިސާބަށް ކުރާނެ ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން ލަފާކޮށްފިއެވެ.
މެޓް އޮފީހުން ބުނިގޮތުގައި މި ތޫފާނާ ގުޅިގެން މެދުރާއްޖެތެރެއާއި ދެކުނުގެ ބައެއް އަތޮޅުތަކަށް ވިއްސާރަކޮށް ގުގުރުން އެކަށީގެންވެއެވެ.

Ad by Hajj Corporation
އެ އިދާރާއިން ބުނި ގޮތުގައި، "ޑިޓުވާ" ތޫފާން މިހާރު ހުރީ ހއ. ތުރާކުނުގެ އިރު އުތުރުން ގާތްގަނޑަކަށް 875 ކިލޯ މީޓަރުގެ ދުރުން، ސްރީލަންކާގެ އުތުރު އައްސޭރިފަށާއި ބޭ އޮފް ބެންގާލްގެ ހުޅަނގު ދެކުނު ސަރަހައްދުގައެވެ.
މި ތޫފާން ދަތުރު ކުރާނެ ކަމަށް ލަފާކުރެވެނީ އުތުރު ހުޅަނގުއުތުރަށް، ރާއްޖެއާ ދުރަށް ވާ ގޮތަށްކަމަށްވެސް މެޓް އޮފީހުން ބުނެފައިވެއެވެ.
މި ތޫފާން އިންޑިއާގެ އުތުރު ޓަމިލްނާޑޫ، ޕޫޑޫޗެރީ އަދި އަންދްރަ ޕްރަދޭޝްގެ ދެކުނު އައްސޭރިފަށަށް ޖެހޭނެ ކަމަށް ލަފާކުރެވެނީ މާދަމާ ހެނދުނުގެ ވަގުތެއްގައެވެ. މިހެންކަމުން، ރާއްޖެއަށް މި ތޫފާނުގެ ސީދާ އަސަރެއް ނުކުރިޔަސް، އޭގެ ސަބަބުން ރާއްޖޭގެ މޫސުމަށް ބަދަލުތަކެއް އަންނާނެއެވެ.މެޓް އޮފީހުން އިތުރަށް ލަފާކުރާ ގޮތުގައި، މި ތޫފާނާ ގުޅިގެން ކުރިއަށް އޮތް 24 ގަޑިއިރުގެ ތެރޭގައި ހާއްސަކޮށް މެދުރާއްޖެތެރޭގެ އެކި ހިސާބުތަކަށާއި ދެކުނުގެ ބައެއް އަތޮޅުތަކަށް ވިއްސާރަކުރުމާއެކު ގުގުރާނެއެވެ.
މިހާރު ކުރަމުންދާ ވިއްސާރަ ކޮންމެވެސް ވަރަކަށް އަންގާރަދުވަހުން ފެށިގެން އަލިކުރާނެކަމަށް ލަފާކުރެވުނު ނަމަވެސް، މޫސުން އެއްކޮށް އަލިނުވާނެކަމަށް މެޓު އޮފީހުން ވަނީ ބުނެފައެވެ. އެހެންކަމުން ކުރިއަށް އޮތް ހަފްތާގެ ތެރޭގައިވެސް މޫސުމަށް ޚާއްސަ ސަމާލުކަމެއް ދޭންޖެހެއެވެ.
ރާއްޖެއަށް މިދުވަސްކޮޅު ވިއްސާރަކުރަމުންދާއިރު ދިވެހީން އާންމުކޮށް ގޮސްއުޅޭ ބައެއް ޤައުމުތަކަށްވެސް ވިއްސާރައިގެ ގެއްލުންތައްދަނީ ލިބެމުންނެވެ.


