އިނގިރޭސި ޕްރިމިއަރ ލީގުގައި މެންޗެސްޓަރ ސިޓީން ފަހުވަގުތު ޖެހި ގޯލާއެކ ލީޑްސް ޔުނައިޓެޑް 3-2 ގެ ނަތީޖާއަކުން ބަލިކޮށްފައެވެ. ސިޓީގެ ފަރާތުން މޮޅު ކުޅުމެއް ދެއްކި ފިލް ފޯޑެން ވަނީ މެޗުގެ ފުރަތަމަ މިނިޓްގައި އަދި ދެވަނަ ހާފުގެ އިތުރު ވަގުތުގައި ގޯލު ޖަހައި، ޓީމަށް މޮޅު ހޯދައިދިނުމުގައި މުހިންމު ދައުރެއް އަދާކޮށްފައެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުގައި ސިޓީން ފުރަތަމަ 25 މިނިޓްގެ ތެރޭގައި 2-0 ގެ ލީޑެއް ނަގައި، މެޗުގެ ކޮންޓްރޯލް ނެގިއެވެ. ފޯޑެން ވަނީ މެޗުގެ ފުރަތަމަ 25 ސިކުންތުގެ ތެރޭގައި މެތިއުސް ނޫނޭސް ދިން ބޯޅައަކުން މޮޅުކޮށް ގޯލެއް ޖަހައި، ސިޓީއަށް ލީޑު ނަގައިދީފައެވެ. މިއީ 2019 ވަނަ އަހަރުގެ ސެޕްޓެމްބަރު މަހަށްފަހު އިއްތިހާދުގައި ޕްރިމިއަރ ލީގުގެ މެޗެއްގައި ސިޓީން އެންމެ އަވަހަށް ޖެހި ގޯލެވެ. އޭގެ ފަހުން، ލީޑްސްގެ ގޯލްކީޕަރު ލޫކަސް ޕެރީ ބްލޮކްކުރި ކޯނަރެއް ނިކޯ އޯރެއިލީގެ ގައިގައި ޖެހިފައި ނިކުތުމުން، ޖޮސްކޯ ގްވާޑިއޯލް ވަނީ ފަސޭހަކަމާއެކު ގޯލު ޖަހައި ލީޑު ފުޅާކޮށްފައެވެ.

Ad by Hajj Corporation

ނަމަވެސް، ދެވަނަ ހާފު ފެށުމާއެކު ލީޑްސް ޔުނައިޓެޑް ވަނީ މެޗަށް އަލުން އެނބުރި އައިސްފައެވެ. ދެވަނަ ހާފުގެ ފުރަތަމަ ހަތަރު މިނިޓް ތެރޭގައި ޑޮމިނިކް ކަލްވަރް-ލެވިން ވަނީ ނޫނޭސްއަށް ހެދުނު ގޯލެއްގެ ފައިދާ ނަގައި ލީޑްސްއަށް ފުރަތަމަ ގޯލު ޖަހައިދީފައެވެ. އަދި 68 ވަނަ މިނިޓްގައި ގްވާޑިއޯލް ކުރި ފައުލަކަށް ލީޑްސްއަށް ޕެނަލްޓީއެއް ލިބުނެވެ. މި ޕެނަލްޓީން ނަމޭޗާ ފޮނުވާލި ބޯޅަ ގޯލްކީޕަރު ޖިއަންލުއިގީ ޑޮނަރޫމާ ސަލާމަތްކުރި ނަމަވެސް، ރީބައުންޑް ބޯޅަ ނަމޭޗާ ވަނީ ގޯލަށް ފޮނުވާލައި ނަތީޖާ ހަމަހަމަކޮށްފައެވެ.

ނަތީޖާ 2-2 އަށް ހަމަހަމަވުމުން ލީޑްސްއިން ވަނީ ސިޓީގެ ގޯލަށް ނުރައްކާ ކުރަން ފަށާފައެވެ. ސިޓީ މޮޅުކޮށްދިނީ އިތުރުވަގުތުގައި ފޯޑެންޖެހި ގޯލަކުންނެވެ. މި ނަތީޖާއާއެކު ސިޓީ އާސެނަލްއަށްވުރެ ހަތަރު ޕޮއިންޓް ފަހަތުގައި އޮތްއިރު، ތިންވަނައިގައި އޮތް ޗެލްސީއަށްވުރެ ދެ ޕޮއިންޓް ކުރިޔަށް ވަނީ ޖެހިލާފައެވެ.