ވިލިމާލޭ ރައްޔިތުންގެ ކަންބޮޑުވުންތަކަށް ހައްލު ހޯއްދަވައިދެއްވަން ރައީސް ނިންމެވީ 300 ގަސް އިންދުމަށް ނިންމަވާފައި: މުހައްމަދު
29 ނޮވެމްބަރު 2025 - 18:35

ވިލިމާލޭ ރައްޔިތުންގެ ދިގު މުއްދަތުގެ ކަންބޮޑުވުންތަކަށް ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ނިންމެވީ ވިލިމާލޭގައި 300 ގަސް އިތުރަށް އިންދުމަށް ނިންމެވުމަށްފަހުގައި ކަމަށް ވިލިމާލޭ ދާއިރާގެ މެންބަރު މުހައްމަދު އިސްމާއީލް ވިދާޅުވެއްޖެއެވެ.

Ad by Hajj Corporation
މެންބަރު މުހައްމަދު މިކަން ހާމަކުރެއްވީ، ވިލިމާލެއިން ނިކަގަސް ކަނޑާ މައްސަލައާ ގުޅިގެން ކުރީގެ ރައީސް މުހައްމަދު ނަޝީދު ސޯޝަލް މީޑިއާގައި ކުރެއްވި ޕޯސްޓަކަށް ރައްދު ދެއްވަމުންނެވެ. އޭނާ ވިދާޅުވީ، ނިކަގަސްތަކާ ކައިރީ ދިރިއުޅޭ ވިލިމާލޭގެ ރައްޔިތުން އެތައް ޒަމާނެއް ވަންދެން އެކަމާ ހިތްހަމަނުޖެހި ކަންބޮޑުވުން ފާޅުކުރަމުން އައިސްފައިވާ ކަމަށެވެ.
މުހައްމަދު އިސްމާއީލް ފާހަގަކުރެއްވި ގޮތުގައި، މަލްޓިޕާޓީ ޑިމޮކްރަސީއަށް ފަހު ތިން ދައުރެއް ނިމި މިހާރު ހަތަރު ވަނަ ދައުރު ފެށިފައިވާއިރު ވެސް، ފާއިތުވެ ދިޔަ ހުރިހާ ވެރިކަމެއްގައި ވެސް އެ މައްސަލަ ހައްލުކޮށްދިނުމަށް އާދޭސްކޮށް އެ ވެރިންނަށް، ގިނަ އަދަދެއްގެ ރައްޔިތުން ސޮއިކޮށް ޕެޓިޝަން ހުށަހަޅާފައިވެއެވެ. ނަމަވެސް މި މައްސަލައަށް މިހާތަނަށް އެއްވެސް ހައްލެއް ހޯދައިދެވިފައިނުވާ ކަމަށް އޭނާ ވިދާޅުވިއެވެ.
މެންބަރު މުހައްމަދު ވިދާޅުވީ، ރައީސް ޑރ. މުޢިއްޒު މި މައްސަލައަށް ހައްލެއް ހޯއްދަވައިދެއްވުމަށް ނިންމަވައިފައިވަނީ ވިލިމާލޭގައި އިތުރު 300 ގަސް އިންދުމަށް ނިންމެވުމަށްފަހުއެވެ. އަދި މި މަސައްކަތް އަންނަ ހަފްތާގައި ފެށިގެން ދާނެ ކަމަށް ވެސް އޭނާ ހާމަކުރެއްވިއެވެ.
ރައީސް މުޢިއްޒުގެ މި ނިންމެވުމަކީ ވިލިމާލޭގެ ގުދުރަތީ ރީތިކަން ހިފަހައްޓައި، އެއްފަރާތުން ގަސްތަކުގެ ސަބަބުން ދިމާވާ ދަތިތަކަށް ވެސް ހައްލެއް ގެނެސްދޭނެ ކަމެއްކެވެ.


