އަވަށްޓެރި ސްރީލަންކާ އަށް ދިމާވެފައިވާ ހިތާމަވެރި ކާރިސާގައި ދިވެހިންގެ ފަރާތުން އެހީވުމަށް ބާއްވާ "ސިލޯނާއެކު ދިވެހިން" ޓެލެތޯންގެ އޮޑިޓް ފަރމްގެ ގޮތުގައި ކްރޯ މޯލްޑިވްސް ހަމަޖައްސައިފި އެވެ.

އާދީއްތަ ދުވަހު ކުރިއަށް ގެންދިޔުމަށް ހަމަޖެހިފައިވާ ޓެލެތޯންގެ އޮޑިޓް ފަރމްގެ ގޮތުގައި ކްރޯ މޯލްޑިވްސް ހަމަޖެއްސުމަށް ބޭއްވި ސޮއިކުރުމުގެ ހަފްލާގައި ޕީއެސްއެމްގެ ފަރާތުން ސޮއިކުރެއްވީ ޑިރެކްޓަރ ޕްރޮޖެކްޓް، ލޭންޑް އެންޑް ބިޒްނަސް ޑިވެލޮޕްމަންޓް، އާއިޝަތު އާސިފާއެވެ. ކްރޯ މޯލްޑިވްސްގެ ފަރާތުން ސޮއިކުރެއްވީ މެނޭޖިންގ ޕާޓްނަރ ހަސަން މުހައްމަދު އެވެ.

Ad by Hajj Corporation

 މި ޓެލެތޯންއާ ގުޅޭގޮތުން ވާހަކަދައްކަވަމުން ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ ޔާމިން ރަޝީދު ވިދާޅުވީ މިއީ ލަންކާއަށް ކުރިމަތިވެފައިވާ ހިތްދަތި ޙާދިސާގައި، އެހީތެރިކަން ފޯރުކޮށްދިނުމުގައި ދިވެހި ރައްޔިތުންގެ ބައިވެރިވުން ދައްކައިދިނުމަށް ކުރިއަށްގެންދަން ނިންމި ޓެލެތޯންއެއް ކަމަށެވެ. ޕީއެސްއެމް އިން އިސްނަގައިގެން ކުރިއަށް ގެންދާ މި ޓެލެތޯންގައި ވަރަށް ގިނަ މީޑިއާތަކާއި އެކިއެކި އިދާރާތަކުގެ އެއްބާރުލުން މިހާރުވެސް ލިބެމުންދާކަން ޔާމިން ފާހަގަކުރެއްވިއެވެ. ޔާމިން ވިދާޅުވީ މި ޓެލެތޯންގައި ލިބޭ ފައިސާ ޖަމާކުރުމަށް ޚާއްސަ އެކައުންޓެއް ހަދާފައިވާ ކަމަށާއި، މާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމަށް ހަމަޖެހިފައިވާ ކަމަށެވެ. އަދި މީގެ އިތުރުންވެސް މި ފަންޑަށް އެހީވުމަށް ފަސޭހަ ގިނަ އިންތިޒާމްތަކެއް ހަމަޖައްސާފަވާ ކަމަށް ޔާމިން ވިދާޅުވިއެވެ،

 "ކިއުއާރް ކޯޑެއްވެސް ދޭނެ. ކޯޑް ސްކޭންކޮށްލައިގެން ފަސޭހައިން ފައިސާ ޖަމާ ކުރެވޭނެ. ވަރަށް ގިނަ ބައެއްގެ އެހީތެރިކަން މިހާރުވެސް ދަނީ ލިބެމުން. އެދެނީ މިކަމުގައި ހުރިހާ ރައްޔިތުން ބައިވެ، ލަންކާގެ ރައްޔިތުންނާއެކު ދިވެހިން ތިބިކަން ދައްކުވައިދިނުން." ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޔާމިން ރަޝީދު ވިދާޅުވިއެވެ.

 ޕީއެސްއެމްގެ ޑިރެކްޓަރ ޕްރޮޖެކްޓް، ލޭންޑް، އެންޑް ބިޒްނަސް ޑިވެލޮޕްމަންޓް އައިޝަތު އާސިފާ ވިދާޅުވީ، މިނިވަން އޮޑިޓް ފަރމްއެއް ނަގައިގެން މި މަސައްކަތް ކުރިއަށްގެންދިއުމުގެ ބޭނުމަކީ، ދެފުށްފެންނަ ގޮތަށް އަދި ރައްޔިތުންގެ އިތުބާރު ދެމެހެއްޓޭ ގޮތަށް ޓެލެތޯން ކުރިއަށް ގެންދިޔުން ކަމަށެވެ.

 "ބޭނުންވަނީ ވީހާވެސް ޓްރާންސްޕޭރެންޓްކޮށް މިކަން ކުރިއަށްގެންދަން. ފައިސާ ލިބެންވާ ފަރާތައް ލިބޭކަން ކަށަވަރުކުރުން." އާސިފާ ވިދާޅުވިއެވެ.

 ކްރޯ މޯލްޑިވެސްގެ މެނޭޖިން ޕަރޓްނަރ ޙަސަން މުޙައްމަދު ވިދާޅުވީ، ކްރޯ ގްލޯބަލް އަކީ ދުނިޔޭގައި ހިނގާ މިފަދަ ބޮޑެތި ކާރިސާތަކުގައި އެހީތެރިކަން ދެމުންދާ ކުންފުންޏެއް ކަމަށެވެ. އެގޮތުން ލަންކާއަށް އެހީވުމަށް ރާއްޖޭގައި ބާއްވާ ޓެލެތޯންގެ އޮޑިޓް މަސައްކަތް އެ ކުންފުނިން ކުރިއަށްގެންދަނީ، ކުންފުނީގެ އިޖުތިމާޢީ ޒިންމާގެ ދަށުން ކަމަށް ހަސަން ވިދާޅުވިއެވެ.

 "ޕީއެސްއެމްގެ މިފަދަ ޓެލެތޯންތަކުގައި ކުރިންވެސް މަސައްކަތްކޮށްފިން. ވަރަށް ރަނގަޅަށް އިންޓަރނަލް ކޮންޓްރޯލް ބެލެހެއްޓިގެން މަސައްކަތްތައް ގެންދާކަން ފާހަގަވޭ. އަދި ރައްދުވާ ފަރާތައް ލިބޭކަން ކަށަވަރުކުރުން އެންމެ މުހިންމު ކަމަކީ." ކްރޯ މޯލްޑިވެސްގެ މެނޭޖިން ޕަރޓްނަރ ޙަސަން މުޙައްމަދު ވިދާޅުވިއެވެ.

 އާދީއްތަ ދުވަހުގެ ހެނދުނު 09:00 އިން މެންދަމު 01:00 ކުރިއަށްގެންދާ "ސިލޯނާއެކު ދިވެހިން" ތެލެތޯންގައި ނަގުދު ފައިސާ، ޓްރާންސްފަރ އަދި ބޭންކް ޗެކް މެދުވެރިކޮށް ފައިސާ ޖަމާކުރެވޭނެއެވެ.