އަވަށްޓެރި ސްރީލަންކާއަށް ކުރިމަތިވެފައިވާ ހާލަތުން އަރައިގަތުމަށް ކުރަމުންދާ މަސައްކަތުގައި އެހީވުމަށް، ދައުލަތުގެ މީޑިއާ، ޕީއެސްއެމްއިން އިސްނަގައިގެން ރާއްޖޭގެ 37 މީޑިއާއަކާ ގުޅިގެން ކުރިއަށް ގެންދާ ޓެލެތޯންގައި، ސަރުކާރު ހިންގާ މައި ޕާޓީ، ޕީއެންސީން ތިން ލައްކަ ރުފިޔާގެ ފައިސާގެ އެހީއެއް ދީފިއެވެ.

ޕީއެންސީގެ ޕާލިމެންޓަރީ ގުރޫޕުގެ ފަރާތުން ވީ މި އެހީގެ ރަމްޒީ ޗެކު ހަވާލުކޮށްފައި ވަނީ، ޕީއެސްއެމްގެ ސްޓޫޑިއޯގައި ކުރިއަށްދާ މި ޓެލެތޯންގެ ލައިވް ކަވަރޭޖްގެ ތެރެއިންނެވެ.

Ad by Hajj Corporation

ޗެކު ހަވާލުކޮށްދެއްވުމަށް، ރައްޔިތުންގެ މަޖިލީހުގެ ރައީސް، ޕީއެންސީގެ ޗެއާޕާސަން އަބްދުއްރަޙީމް އަބްދުﷲ އާއި އެ ޕާޓީގެ ޕާލިމެންޓަރީ ގުރޫޕުގެ ލީޑަރު އިބްރާޙީމް ފަލާޙްގެ އިތުރުން އެ ޕާޓީގެ ޕީޖީ ގުރޫޕުގެ ގިނަ މެމްބަރުންތަކެއް ވަޑައިގެންނެވިއެވެ.

މި ޗެކާ ޕީއެސްއެމްގެ ފަރާތުން ހަވާލުވެވަޑައިގެންނެވީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރ ޔާމީން ރަޝީދެވެ.

ޗެކު ހަވާލުކޮށްދެއްވުމަށްފަހު ވާހަކަފުޅުދައްކަވަމުން ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަޙީމް ވަނީ، ސިލޯނަކީ ރާއްޖެއާ ވަރަށް އުޚުއްވަތްތެރި ގައުމެއް ކަމަށާއި އެއް ގައުމަކަށް އެންމެ ގިނައިން ދިވެހިން ދަތުރުކުރާ ގައުމުކަން ފާހަގަކުރައްވާފައެވެ. ރާއްޖެއާއި ލަންކާއާ ދެމެދު އޮތީ އެއްބަނޑު އެއްބަފާކަން ފަދަ ގުޅުމެއް ކަމުން، ލަންކާއަށް މި ހާލަތު ކުރިމަތިވުމުން ވެސް އެންމެ ފުރަތަމަ އިސްނެގި ގައުމަކީ ދިވެހިރާއްޖެކަން އަބްދުއްރަޙީމް ފާހަގަކުރެއްވިއެވެ. ސްރީލަންކާއިން އެހީއަށް އެދި ގޮވާލި ގޮވާލުމަށް އެންމެފުރަތަމަ އިޖާބަދިން ގައުމަކީ ރާއްޖެކަން އަދި ވެރިއަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުކަން، ރާއްޖޭގައި ހުންނަވާ ސްރީލަންކާގެ ހައިކޮމިޝަނަރު ވެސް ފާހަގަކުރެއްވިކަން އަބްދުއްރަޙީމްގެ ވާހަކަފުޅުގައި ފާޙަގަކުރެއްވިއެވެ.

އަބްދުއްރަހީމް ވަނީ، ލަންކާއަށް ކުރިމަތިވި ހާލަތުން އެ ގައުމަށް އަރައިގަނެވެންދެން، ދިވެހިން ތިބީ ދިވެހިންގެ ފެންވަރުން ވެވެން އޮތް ހުރިހާ އެހީތެރިކަމެއް ފޯރުކޮށްދޭން ތައްޔާރަށް، އެ ގައުމުގެ ރައްޔިތުންނާ އެކުގައިކަމަށް ވިދާޅުވެފައެވެ. އަދި މިއީ ގައުމީ ކަމެއްގެ ގޮތުގައި ދެކުމަށް ހުރިހާ ދިވެހިންނަށް ވެސް އެމަނިކުފާނު އިލްތިމާސްކުރެއްވިއެވެ.

"އަޅުގަނޑު ދަންނަވާލަން ބޭނުންވަނީ، އަޅުގަނޑުމެން ދިވެހިން މިތިބީ އިރާދަކުރެއްވިއްޔާ ސްރީލަންކާއަށް މި ދިމާވި ކާރިސާގައި އެބޭފުޅުންނަށް އެކަމުން އަރައިގަނެވެންދެން، އަޅުގަނޑުމެންގެ ފެންވަރުން، އަޅުގަނޑުމެންނަށް ވެދެވެން އޮތް ހުރިހާ އެހީތެރިކަމެއް ވެދިނުމަށް، ލަންކާގެ ރައްޔިތުންނާއެކީގައޭ. މި ފުރުސަތުގައި އަޅުގަނޑު ދަންވާލަން ހަމަ ދިވެހި ލޮބުވެތި ހުރިހާ ރައްޔިތުންނަށް، މިކަމަކީ ގައުމީ ކަމެއްގެ ގޮތުގައި ދެކެވަޑައިގެން އެ ބޭފުޅަކަށް ވެވަޑައިގެންނެވޭ މިންވަރަކުން ސްރީލަންކާގެ ރައްޔިތުންނަށް އެހީތެރިވެދެއްވާށޭ - ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަޙީމް އަބްދުﷲ

މި ޓެލެތޯންއަށް ޕީއެންސީން ތިންލައްކަ ރުފިޔާގެ އެހީތެރިކަމެއް ފޯރުކޮށްދީފައިވާއިރު، ހެނދުނު 09:00 ގައި ފެށި މި ޓެލެތޯންއަށް ހަވީރު 04:30 އާ ހަމައަށް 1.4 މިލިއަން ދިވެހި ރުފިޔާ ލިބިފައިވެއެވެ. އަދި 37،448 ޑޮލަރު ވެސް އެހީގެ ގޮތުގައި ލިބިފައިވެއެވެ.