ޕީޕަލްސް ނޭޝަނަލް ކޮންގްރެސް (ޕީއެންސީ) އިން އިންތިޒާމުކޮށްގެން ބާއްވާ "ދަ ގްރޭޓަރ އައްޑޫ" ޚާއްޞަ ޖަލްސާ މިރޭ މާލޭގައި ބޭއްވުމަށް ނިންމައިފިއެވެ.

ޕީއެންސީ އިން ބުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އައްޑޫ ސިޓީގެ ތަރައްޤީއަށް ގެންގުޅުއްވާ "ދަ ގްރޭޓަރ އައްޑޫ ވިޝަން" ގެ ތަފްސީލުތައް ރަސްމީކޮށް ލޯންޗުކުރުމަށް ބާއްވާ މި ޖަލްސާ އޮންނާނީ މިރޭ 21:30 ގައި މާލޭ އާޓިފިޝަލް ބީޗުގައި ކަމަށެވެ.

Ad by Hajj Corporation

މި ޖަލްސާގައި ލޯކަލް ކައުންސިލް އިންތިޚާބުގައި އައްޑޫ ސިޓީ ކައުންސިލަށް ޕީއެންސީގެ ޓިކެޓްގައި ވާދަކުރަށްވާ ކެންޑިޑޭޓުން ތަޢާރަފްކުރުން އޮންނާނެއެވެ. އަދި އައްޑޫ ސިޓީގެ ތަރައްޤީއަށް ސަރުކާރުން ރާވާފައިވާ ބިޔަ މަޝްރޫޢުތަކާއި، އެ ސިޓީގެ މުސްތަޤުބަލާ ގުޅޭ މުހިންމު މަޢުލޫމާތުތައް ހިއްސާ ކުރާނެއެވެ.

ޕީއެންސީން ވަނީ މާލޭގައި ދިރިއުޅޭ އައްޑޫ ސިޓީގެ އެންމެހާ ރައްޔިތުންނާއި، އެ ސިޓީގެ ތަރައްޤީއަށް އެދޭ ހުރިހާ ފަރާތްތަކުން މިރޭގެ މި ޖަލްސާގައި ބައިވެރިވުމަށް އާންމުކޮށް ދަޢުވަތު އަރުވާފައެވެ.

މި ޖަލްސާގައި ދައުލަތުގެ އިސްވެރިންނާއި ސަރުކާރު ހިންގާ ޕީއެންސީގެ އިސް ބޭފުޅުން ބައިވެރިވެވަޑައިގަންނަވާނެއެވެ.