ރައްޔިތުންނަށް ހިދުމަތެއް ކުރުމަށް ބޭނުންވާ ވެރިންނަށް ލޯކަލް ކައުންސިލު އިންތިހާބަކީ "ބޮޑު" އިންތިހާބެއް ކަމަށް ކޮންގްރެސް ޕާޓީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެއެވެ.

ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަދައްކަވަމުން ފަލާހު ވިދާޅުވީ އޭގެ ސަބަބަކީ ސަރުކާރުން ރަށްރަށުގައި ހިންގާ ތަރައްގީގެ މަޝްރޫއުތަކަށް އެންމެ ބޮޑު އެހީތެރިކަމެއް ލިބޭނީ ކައުންސިލަރުންގެ ފަރާތުން ކަމަށް ވާތީ ކަމަށެވެ.

Ad by Hajj Corporation

މާޒީއަށް ބަލާއިރު، ލޯކަލް ކައުންސިލް އިންތިހާބު މާ މުހިންމު ކަމަށް ދެކިގެން ސިޔާސީ ބޭފުޅުން ނޫޅުއްވާކަން ފާހަގަކުރައްވާ ފަލާހު ވިދާޅުވީ އެކަން އެހެން ވަނީ ރައްޔިތުންނަށް ހިދުމަތް ކުރުމުގެ ވިސްނުން މާޒީގެ ވެރިކަންތަކުގައި ނުގެންގުޅޭތީ ކަމަށެވެ.

އެހެންނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވިސްނުން މިކަމުގައި ތަފާތު ކަމަށާއި ސަރުކާރެއް ހިންގުމުގެ އެންމެ މުހިންމު ތިން މަގާމު ރައީސް ޑރ. މުއިއްޒު ފުރުއްވާފައިވާތީ އެކަމުން ތަޖުރިބާ ލިބިގަނެ، މިހާރު އެމަނިކުފާނު ކުރައްވަމުން ގެންދަވާ މަސައްކަތްޕުޅުތަކަކީ ލާމަރުކަޒީ ނިޒާމު ހަރުދަނާ ކުރުމުގެ މަސައްކަތްކަމަށް ވެސް ވިދާޅުވިއެވެ.

މީގެއިތުރުން ރައްޔިތުންގެ ފެންނަ ނުފެންނަ ވޯޓަކީ ރިޔާސީ އިންތިހާބާ އެއްވެސް ގުޅުމެއްއޮތް ވޯޓެއް ނޫން ކަމަށާއި ދެ އިންތިހާބު އެއްދުވަހެއްގައި ބާއްވަން ފެނޭތޯ ނަގާ ވޯޓަކީ ދިވެހި ރައްޔިތުން އިއްތިފާގުވާ ވޯޓެއް ކަމަށް ވެސް ވިދާޅުވިއެވެ. އެގޮތުން އެއް ދުވަހެއްގައި ލޯކަލް ކައުންސިލް އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ބާއްވާ ވޯޓަކީ މި ގައުމަށް އެންމެ ފައިދާ ހުރި ގޮތް ކަމަށެވެ

ފަލާހު ވަނީ ކުރިއަށް އޮތް ކައުންސިލް އިންތިހާބު ރައީސް ޑރ. މުއިއްޒަށް މުހިންމު ވަނީ އެމަނިކުފާނު ވައުދުވަޑައިގެންފައި ވާގޮތަށް މުޅި ރާއްޖޭގެ ތަރައްގީގެ ދުވެލި ހަލުވި ކުރުމަށް ކަމަށެވެ.