އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޓިކެޓުގައި ވާދަކުރަން ބޭނުންވާ ކެނޑިޑޭޓުން ހޮވުމަށް ބާއްވާ ޕްރައިމަރީގައި ބައިވެރިވުމުގެ ފުރުޞަތު، މާދަމާ ހުޅުވާލާނެކަމަށް އެ ޕާޓީން ވިދާޅުވެއްޖެއެވެ.

ޕީއެންސީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޕީއެންސީގެ ޕާލިމެންޓަރީ ގުރޫޕުގެ ލީޑަރު އަދި ކެންޕެއިން މެނޭޖަރު އިބްރާޙީމް ފަލާޙު ވިދާޅުވީ، ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބާއި ގުޅިގެން ޕީއެންސީން ބާއްވާ ޕްރައިމަރީގައި ވަރަށް ގިނަ ޢަދަދެއްގެ ކެންޑިޑޭޓުން ވާދަކުރާނެކަމަށް ލަފާކުރެވޭ ކަމަށެވެ.

Ad by Hajj Corporation

"އަޅުގަނޑުމެންގެ މި އިންތިޚާބު ވެގެންދާނީ މިހާތަނަށް ރާއްޖޭގައި ބޭއްވޭ އެންމެ ބޮޑު ޕްރައިމަރީއަށް ކަމަށް އަޅުގަނޑުމެންނަށް ގަބޫލުކުރެވޭ. ވަރަށް ގިނަ މެންބަރުން މިހާރުވެސް މިކަމުގެ ޝައުގުވެރިކަން ހާމަކުރައްވައިފި." ފަލާޙު ވިދާޅުވިއެވެ.

ފަލާޙު އިތުރަށް ވިދާޅުވީ، ޕްރައިމަރީގައި ބައިވެރިވުމުގެ ފުރުޞުތު މާދަމާއިން ފެށިގެން ޑިސެންބަރު މަހުގެ 15 ގެ ނިޔަލަށް ހުޅުވާލާއިރު، ކުރިމަތިލެވޭނީ ޕާޓީގެ ވެބްސައިޓުގައި އޮންނަ އޮންލައިން ފޯމެއް މެދުވެރިކޮށް ކަމަށާއި އަދި ކުރިމަތިލެވޭނީ، މިވަގުތު ޕާޓީގެ މެންބަރެއްގެ ގޮތުގައި ދަފުތަރުވެފައިވާ ފަރާތްތަކަށް ކަމަށެވެ. އިލެކްޝަންސް ކޮމިޝަނުން ހާމަކުރައްވާފައިވާ ސިޔާސީ ޕާޓީތަކުގެ ދަފުތަރުގައިވާ ގޮތުން، ޕީއެންސީގައި 68،665 މެންބަރުން އެބަތިއްބެވެ.

ޕީއެންސީގެ ޕްރައިމަރީގެ ވޯޓުލުން އަންނަ މަހު 27 ގައި ބޭއްވުމަށް ހަމަޖެހިފައިވާއިރު، ފަލާޙު ވިދާޅުވީ ޕްރައިމަރީގައި ވޯޓުލެވޭނީ އެ މީހެއްގެ ރަޖިސްޓްރީ އޮންނަ ރަށެއްގައި ބަހައްޓާ ވޯޓު ފޮއްޓަށްކަމަށާއި މާލޭގައި ރަށްރަށުގެ ވޯޓު ފޮށިތައް ނުބަހައްޓާނެކަމަށެވެ.

މީގެއިތުރުން، ޕްރައިމަރީގައި ވާދަނުކޮށް އެއްވެސް މީހަކަށް ޓިކެޓް ނުދޭނެ ކަމަށާއި ޕްރައިމަރީގެ ހުރިހާ ކަމެއްވެސް ކުރިއަށް ގެންދާނީ ވަރަށް އިންސާފުވެރިކޮށް އަދި ހާމަކަން ބޮޑު ގޮތެއްގައިކަމަށް ފަލާޙު ވިދާޅުވިއެވެ.

ލޯކަލް ކައުންސިލްތަކުގެ އިންތިޚާބާއި ޑަބްލިއުޑީސީ އިންތިޚާބަށް ޢާންމުން ހޭލުންތެރިކުރުމުގެ މަސައްކަތް އިލެކްޝަންސް ކޮމިޝަނުން މިހާރު ވަނީ ފަށައިފައެވެ. އެގޮތުން، މިހާރުވެސް 12 އަތޮޅެއްގެ 36 ރަށެއްގައި މީހުން ހޭލުންތެރިކުރުމަށް އެ ކޮމިޝަންގެ ޓީމުތައް އަންނަނީ ޙަރަކާތްތެރިވަމުންނެވެ.