އެމްޑީޕީން ސިޔާސީ މައިދާނަށް މީހުން ތަމްރީނުކޮށް ނެރެނީ ވަރަށް ނުބައި ސިފައެއްގައި ކަމަށް ޕީއެންސީގެ ޕާލިމަންޓްރީ ގުރޫޕުގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.

ފަލާހު މިހެން ވިދާޅުވީ ފުވައްމުލަކުގައި ޕީއެންސީން ކުރިޔަށް ގެންދިޔަ ކައުންސިލް އިންތިހާބުގެ ކެމްޕެއިން ޖަލްސާގައި ވާހަކަ ދައްކަވަމުންނެވެ.

Ad by Hajj Corporation

މެންބަރު ފަލާހު ވިދާޅުވީ އެމްޑީޕީގެ ފަރާތުން ރަށްރަށުގެ ކައުންސިލްތަކަށާއި ރައްޔިތުންގެ މަޖިލީހަށް އަންނަ މެންބަރުންނަކީ ގާނޫނުއަސާސީއާއި ގާނޫނުތަކަށް ހުރުމަތްތެރިކޮށް ހިތާ ބައެއް ނޫންކަމަށެވެ.

މީގެ އިތުރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ގައުމުދެކެ ލޯބިވާ އިހުލާސްތެރި ބޭފުޅެއް ކަމަށާއި އެފަދަ ތެދުވެރި، އަމާނާތްތެރި ވެރިއަކު ގައުމަކަށް ލިބެނީ ވަރަށް މަދު ހާލަތެއްގައި ކަމަށްވެސް ވިދާޅުވިއެވެ. އަދި ރައީސުލްޖުމްހޫރިއްޔާއަށް ވަރަށް ބޮޑަށް އިތުބާރު ކުރައްވާ ކަމަށާއި ރައީސް ކަމެއް ކޮށްދެއްވާނެ ކަމަށް ވިދާޅުވެއްޖެނަމަ، އެކަމެއް ކުރައްވާނެ ކަމުގެ ފުރިހަމަ ޔަގީންކަން ރައްޔިތުންނަށް އެބައޮތް ކަމަށް ވެސް ފަލާހު ވިދާޅުވިއެވެ.

މީގެއިތުރުން ފަލާހު ވިދާޅުވި ގޮތުގައި ރައީސް މުއިއްޒު ވެރިކަމާ ހަވާލުވެވަޑައިގެންނެވި އިރު، ރާއްޖޭގެ އިގްތިސާދީ ހާލަތު އޮތީ އަވަށްޓެރި ސްރީލަންކާއަށް ދިމާވި ފަދަ ނުރައްކާތެރި ކާރިސާއެއްގެ ދިމާވުމުގެ ނާޒުކު ހާލަތެއްގައި ކަމަށެވެ. ނަމަވެސް ރައީސްގެ ހިކުމަތްތެރިކަމާއެކު އެ ހާލަތުން ގައުމު ސަލާމަތްކޮށްދެއްވާނެ ކަމުގެ އިތުބާރު ރައްޔިތުންނަށް އެބައޮތް ކަމަށް މެމްބަރ ފަލާހު ވިދާޅުވިއެވެ.