ކުރިއަށް އޮތް އިންތިހާބުގައި އިދިކޮޅު ފަރާތްތައް ވަރަށްބޮޑުތަނުން ބަލިވާނެ ކަމުގައި ރައްޔިތުންގެ މަޖިލީހުގެ ފުވައްމުލަކު ސިޓީ ދެކުނު ދާއިރާގެ މެންބަރު އިބްރާހީމް ޙުސައިން ވިދާޅުވެއްޖެއެވެ.

މެންދުރު ޓީވީގެ 'މައުޟޫ' ޕްރޮގްރާމުގައި ވާހަކަ ދައްކަވަމުން އެމްޕީ ވިދާޅުވީ މިހާރު މާޒީ ނިމި ހިނގައްޖެ ކަމަށާއި މީގެކުރީން އޮޅުވާލައިގެން ވޯޓު ހޯދަމުން އައި ފަރާތްތަކަށް ރައްޔިތުންނަށް ނޫނެކޭ ބުނާނެ ކަމަށެވެ. އަދި ރައްޔިތުން މިއަދު ތަހައްމަލު ކުރަމުން މިދާ ދަތި، އުނދަގޫ ކަންކަމަކީ ޕީއެންސީން ނުވަތަ އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަބަބުން ކުރިމަތިވި ކަންކަމެއް ނޫން ކަމުގައި ވިދާޅުވިއެވެ.

Ad by Hajj Corporation

އެމްޕީ ވިދާޅުވީ މިއީ ރައްޔިތުން ވިސްނާނެ ކަންތައްތައް ކަމަށާއި ރައްޔިތުންނަކީ ތަންދިރު ނޭނގޭ ބައެއްކަމުގައި އަޅުގަނޑުމެން ދެކިގެން ނުވާނެ ކަމަށެވެ. އަދި މިއީ އެންމެ ކްލިކަކުން ހުރިހާ ކަމެއް ފެނި، ހާމަވާ ދުވަސްވަރުކަން ވެސް ފާހަގަކުރެއްވިއެވެ.

މީގެއިތުރުން ރާއްޖޭގެ އިގްތިސާދު ރަނގަޅުވެގެން އައިގޮތް ފާހަގަކުރައްވަމުން ވިދާޅުވީ ރައީސް ޑރ. މުއިއްޒުގެ ވެރިކަމުގައި ބޮޑެތި ކުރިއެރުންތަކެއް ހޯދާފައިވާ ކަމަށް ވެސް ވިދާޅުވިއެވެ. އެގޮތުން ބަޖެޓު ޑެފިސިޓް ގާތްގަޑަކަށް 73.5 ޕަސެންޓު ކުޑަކޮށްފައިވާކަން ވަނީ ފާހަގަކުރައްވާފައެވެ.

މެމްބަރ އިބްރާހީމް ޙުސައިން ވިދާޅުވީ ރާއްޖޭގެ ރައްޔިތުން ބޭނުންވާނެ ކަންކަމަކީ މިއީ ކަމަށާއި ކުރިއަށް އޮތް އުޖާލާ މުސްތަގުބަލު މިއަދު ފެންނަކަމަށް ވެސް ވިދާޅުވިއެވެ. އެހެންކަމުން ކުރިއަށް އޮތް ލޯކަލް ކައުންސިލު އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބު އިދިކޮޅު ފަރާތްތަކަށް ކާމިޔާބުކުރެވިދާނެކަމަށް އެއްގޮތަކަށް ވެސް ގަބޫލުނުކުރައްވާ ކަމުގައި ވިދާޅުވިއެވެ.

އެމްޕީ ވިދާޅުވީ އިދިކޮޅު ފަރާތްތަކުގެ ތެރޭގައި އެފަދަ ރޫހެއް ވެސް ނެތް ކަމަށާއި އެ މަންޒަރު ވެސް ނުފެންނަ ކަމަށެވެ. އަދި ރައްޔިތުންގެ ތާއީދު އޮތްތަނެއް ވެސް ނުފެންނަކަމަށާއި އިދިކޮޅު ޕާޓީތަކުން ރަށެއްގައި އެއްވުމެއް ބޭއްވިޔަސް ފެންނަނީ ވަރަށް މަދު ބަޔަކު ޖަމާވާތަން ކަމަށް ވެސް ވިދާޅުވިއެވެ.