ސަރުކާރާ އިދިކީލި މީހުން ކައުންސިލްތަކަށް ހޮވުމުން ވެގެންދާނެގޮތް ރައްޔިތުންނަށް މިހާރު އޮޅިފައި ނުވާނެކަމުގައި މަޖިލިހުގެ ވިލިމާލެ ދާއިރާގެ މެމްބަރު މުހައްމަދު އިސްމާއިލް ވިދާޅުވެއްޖެއެވެ.

މީސްމީޑިއާގެ 'އެކްސް' ގައި ކުރައްވާފައިވާ ޕޯސްޓެއްގައި މުޙައްމަދު އިސްމާއިލް ވިދާޅުވީ ވެރިކަންކުރާ ޕާޓީއާ ދެކޮޅު ކައުންސިލްތަކުން، އޭރު އޮންނަ ސަރުކާރަކަށް ޖެއްސުން ކުރަމުން އަންނަކަމަށެވެ.

Ad by Hajj Corporation

މިއަހަރުގެ އޭޕްރިލް މަހު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑޭޓުން ހޮވަންޖެހޭ އެތަކެއް ސަބަބުތަކެއް އެބަހުރި ކަމަށް އޭނާ ވިދާޅުވިއެވެ.

މުޙައްމަދު އިސްމާއިލް ފާހަގަކުރެއްވި ގޮތުގައި ރައްޔިތުން ބޭނުންވާ މަގަށް ރައްޔިތުންގެ ގާތުން ހިދުމަތް ދިނުމާއި ތަރައްގީގެ އެންމެހާ މަޝްރޫއުތައް ހިންގުމަށް އުފެދިގެންދާ ގާނޫނީ ގޮތުން ބޮޑެތި ބާރުތަކެއް ކައުންސިލްތަކަށް ލިބިގެންދާނީ ޕީއެންސީ ކެންޑިޑޭޓުން ހޮވުމުންނެވެ.

މީގެއިތުރުން ޑިމޮކްރަސީގެ ހަޔާތުގައި ވެރިކަންކުރާ ޕާޓީއާ ދެކޮޅު ކައުންސިލްތަކުން ރައްޔިތުންނާ ގާތުން ހިދުމަތް ދިނުމަށްވުރެ އިސްކަންދީފަހުރީ ސަރުކާރަކަށް ކަނޑައެޅިގެން ސިއްރާ ފާޅުގައި ޖެއްސުންކުރުން ކަމުގައި ވެސް އޭނާ ވިދާޅުވިއެވެ. އަދި އެކައުންސިލްގެ މެޖޯރިޓީ އޮންނަ ޕާޓީން އަންގާ ގޮތަށް ކަންކަން ނިންމުން ކަމަށާއި އެގޮތަށް ކަންކަން ކުރާނެކަމުގެ ބިރުވެރިކަން އުފެދިފައިވާކަމަށް އެމްޕީ މުޙައްމަދު އިސްމާއިލް ވިދާޅުވިއެވެ.

އެހެންކަމުން މުހައްމަދު އިސްމާއިލް ވަނީ ޕީއެންސީގެ ކެންޑިޑޭޓުން ހޮވާދިނުމަކީ ރައްޔިތުންގެ ބާރުވެރިކަމާ ތަރައްގީ އަވަސްވެ، ހަލުއިވެގެންދާނެ އެންމެ މޮޅުގޮތްކަމަށް ދެކުމަށާއި ޕީއެންސީގެ ކެންޑިޑޭޓުން ހޮވައިދިނުމަށް  ހުރިހާ ރައްޔިތުންގެ ކިބައިން އެދިފައެވެ.