ކައުންސިލްތަކަކީ ވަކި ވެރިކަމެއް ކުރާ ވަކި ސަރުކާރެއް ކަމަށް ދެކިގެން ބައެއް ކައުންސިލަރުން އަމަލުކުރަމުންދާ ކަމަށް ވިދާޅުވެ، ކުޑަހުވަދޫ ދާއިރާގެ މެންބަރު ހުސައިން ހަމީދު އެފަދަ ކައުންސިލަރުންނަށް، ހާއްސަކޮށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޓިކެޓުގައި އިންތިހާބުވެފައިވާ ކައުންސިލަރުންނަށް ފާޑުވިދާޅުވެއްޖެއެވެ.

ލޯކަލް ކައުންސިލްތަކުގެ ދައުރާ ގުޅޭގޮތުން މެންދުރު ޓީވީގެ މައުޟޫއު ޕުރޮގްރާމްގައި ވާހަކަދައްކަވަމުން ހުސައިން ވިދާޅުވީ، މަގާމުގެ މަސްއޫލިއްޔަތުތަކަށް ބެލުމެއްނެތި، ސަރުކާރުގެ ސިޔާސަތުތަކާ ފާޅުގައި ދެކޮޅުހަދައި ސަރުކާރާ ދެކޮޅަށް މަސައްކަތް ކުރެވޭނެ ކަމަށް ބައެއް ކައުންސިލަރުން ގަބޫލުކުރައްވާ ކަމަށެވެ.

Ad by Hajj Corporation

އޭނާ ވިދާޅުވީ، ކައުންސިލަރުން އެބޭފުޅުންގެ ޒިންމާތައް އަދާކުރުމުގެ ބަދަލުގައި، އެކި ކަންކަމުގައި މައި ސަރުކާރު ކުށްވެރިކުރަމުންދާތީ ބައެއް ރަށްރަށުގައި އާންމުންގެ ނުރުހުން އިތުރުވަމުންދާ ކަމަށެވެ.

ހުސައިން ފާހަގަކުރެއްވި ގޮތުގައި، ލޯކަލް ކައުންސިލްތަކުން ކުރަންޖެހޭ ކަމަކީ މައި ސަރުކާރުގެ ސިޔާސަތުތައް ތަންފީޒުކުރުމެވެ. އަދި ކައުންސިލްތަކަކީ ގައުމީ ސިޔާސަތުތަކާ ވަކިން އަމިއްލަ އިހުތިޔާރުގައި ކަންކަން ކުރުމުގެ ބާރު ލިބިފައިވާ، ވަކި ވެރިކަމެއް ހިންގާ ބައެއް ނޫން ކަމަށްވެސް ވިދާޅުވިއެވެ.

މެމްބަރު ހުސައިން ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޕީއެންސީ ސަރުކާރަކީ ގައުމީ ނިންމުންތައް ނިންމުމުގެ އެންމެ ފަހު ބަސް ބުނާ ފަރާތް ކަމަށާއި، އަދި އެއްވެސް ރަށެއްގެ ރައްޔިތުންނަށް ދަތިވާނެ ފަދަ ނިންމުމެއް އެމަނިކުފާނުގެ ސަރުކާރުން ނުނިންމާނެ ކަމަށެވެ.