1447 ވަނަ އަހަރުގެ ޙައްޖުގައި ދިވެހި ޙައްޖާޖީންނަށް ފޯރުކޮށްދޭ ޚިދުމަތްތަކުގެ ފެންވަރު އިތުރަށް ރަނގަޅުކުރުމަށް މަޝްވަރާކޮށްފިއެވެ.

މި މަޝްވަރާތައް ކުރިއަށްގެންގޮސްފައިވަނީ 1447 ވަނަ އަހަރުގެ ޙައްޖުގައި ދިވެހި ޙައްޖާޖީން، މިނާ އަދި ޢަރަފާތުގައި ތިބޭނެ ތަނާއި އިންތިޒާމުތަކާ ގުޅޭގޮތުން ސަޢުދި ޢަރަބިއްޔާގެ މިނިސްޓްރީ އޮފް ޙައްޖާއެކު ޙައްޖު ކޯޕަރޭޝަނުން މިއަދު ކުރި ބައްދަލުވުމުގެ ތެރެއިންނެވެ.

Ad by Hajj Corporation

މިދިޔަ އަހަރަކީ ދިވެހި ތާރީޚުގައި ދިވެހި ޙައްޖާޖީންނަށް އެންމެ ފެންވަރު ރަނގަޅު އަދި އިންތިޒާމުތައްވެސް އެންމެ ފުރިހަމަ އަހަރެވެ.

މި ބައްދަލުވުމުގައި ހައްޖު ކޯޕަރޭޝަންގެ ފަރާތުން ބައިވެރިވެވަޑައިގަތީ މެނޭޖިންގ ޑިރެކްޓަރ މުޙައްމަދު ޝަކީލާއި، ޑެޕިއުޓީ މެނޭޖިންގ ޑިރެކްޓަރ އަލްއުސްތާޛު ޢަލީ ޝަރީފެވެ. އަދި ސަޢުދީގެ ޙައްޖު މިނިސްޓްރީގެ ފަރާތުން ބައިވެރިވެވަޑައިގަތީ މުސްތަޝާރު ތަފުވީޖު ޙާތިމް ޢަބުދުއްރަޙުމާން އައްޞާއިގެވެ.

ހައްޖު ކޯޕަރޭޝަނުން ބުނީ މިއަދުގެ މަޝްވަރާތަކުގައި ދިވެހި ޙައްޖާޖީންނަށް ފޯރުކޮށްދޭ ޚިދުމަތްތަކުގެ ފެންވަރު އިތުރަށް ރަނގަޅުކުރުމަށް މަޝްވަރާކުރައްވާފައިވާކަން ހާމަކުރައްވާފައެވެ.

1447 ވަނަ އަހަރުގެ ޙައްޖު މޫސުމަށް ސަރުކާރުން ތައްޔާރުވަމުން އަންނައިރު އެހެން ޤައުމުތަކަށް ދީފައި ހުންނަ ކޯޓާގެ ތެރެއިން އެޤައުމުތަކުން ބޭނުން ނުކޮށް ހުންނަ ކޯޓާ، ކޯޓާ އިތުރަށް ބޭނުންވާ ޤައުމުތަކުން ބޭނުން ކުރެވޭ ގޮތައް ސައުދީއިން ކުރިއަށް ގެންދާ ( ހައްޖު މުބާޝިރު) އިނިޝިއޭޓިވް އިން ރާއްޖެއަށް ފުރުޞަތު ހޯދަންވެސް މިފަހުން ވަނީ މަޝްވަރާކޮށްފައެވެ.

މިއަންނަ ހައްޖުން ފެށިގެން، ހައްޖު މޫސުމުގައި އެންމެހައި ހައްޖުވެރިންގެ ހަދްޔު ކަތިލުމާއި އުޟްޙިޔާ ކަތިލުން ކުރިއަށް ގެންދާނީ ސީދާ ހައްޖު މިނިސްޓްރީގެ ބެލުމުގެ ދަށުން ކަމުގައި ސައުދީ ސަރުކާރުން ވަނީ ނިންމާފައެވެ.