2024 ވަނަ އަހަރު މިފްކޯގެ އާމްދަނީ ދަށަށް, ކުންފުނި ކޮޅަށްޖެހުމުގެ މަސައްކަތް ކުރިއަށް
30 ނޮވެމްބަރު 2025 - 17:11

2024 ވަނަ އަހަރު މިފްކޯގެ އާމްދަނީ 2.009 ބިލިއަން ރުފިޔާއިން 1.076 ބިލިއަން ރުފިޔާއަށް ދަށަށް ގޮސްފިއެވެ.
މިފްކޯއިން ނެރުނު ބަޔާނުގައިވަނީ 2024 ވަނަ އަހަރު މިފްކޯއަށް ދިމާވި މާލީ ގެއްލުމުގެ އަސްލަކީ ކުންފުނީގެ ވިޔަފާރިއަށް ބޭނުންވާ މައިގަނޑު ރޯމެޓީރިއަލްސް ކަމަށްވާ މަސް ނުލިބުންކަމަށެވެ. މިފްކޯގެ ތާރީޚުގައިވެސް ނުފެންނަ ވަރަށް ރާއްޖޭގެ މަސްވެރިކަން ދަށްވުމާ ގުޅިގެން، 2024 ވަނަ އަހަރުގެ އޭޕްރީލް މަހުން ފެށިގެން ކުންފުންޏަށް ލިބުނު މަހުގެ އަދަދު ވަނީ ވަރަށް ބޮޑަށް ދަށްވެފައިމަށާއި އެގޮތުން 2024 ވަނަ އަހަރު ކުންފުނީގެ އާމްދަނީ 2.009 ބިލިއަން ރުފިޔާއިން 1.076 ބިލިއަން ރުފިޔާއަށް ދަށަށް ގޮސްފައިވާކަމަށް އެކުންފުނީގެ ބަޔާނުގައިވެއެވެ. މިއީ އޭގެ ކުރީ އަހަރާ އަޅައިބަލާއިރު 933 މިލިއަން ރުފިޔާގެ ދަށްވުމެކެވެ.

Ad by Hajj Corporation
މިފްކޯއިން ބުނީ ފާއިތުވި 2024 ވަނަ އަހަރަކީ އެކި ގޮތްގޮތުން ކުންފުންޏަށް ގިނަގުނަ ގޮންޖެހުންތައް ކުރިމަތިވި އަހަރަކަށް ވީނަމަވެސް މާތް ﷲ ގެ ވާގިފުޅާއިއެކު، އެ ހުރިހާ ގޮންޖެހުންތަކުން އަރައިގަނެ މަސްވެރި ސިނާޢަތާއި މަސްވެރިން އަދި ދިވެހި ރައްޔިތުންނަށް ޚިދުމަތް ފޯރުކޮށްދިނުމުގައި ދެމިއޮތުމަށް ކުރެވޭ މަސައްކަތުގައި ކުންފުނިން ވަނީ ކާމިޔާބު ހޯދާފައިކަމަށެވެ. މިހިނގާ 2025 ވަނަ އަހަރަކީވެސް މިފްކޯއަށް ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާ އަހަރަކަށް ވީނަމަވެސް މިހާރުގެ މެނޭޖްމަންޓުން ދަނީ ކުންފުނީގެ އާމްދަނީ ހަރުދަނާކޮށް، އާންމު ބާޒާރުގެ ހާލަތުގައި ވެސް ކުންފުނީގެ ވިޔަފާރީގެ އޮނިގަނޑު ދެމެހެއްޓެނިވި ގޮތަށް ސާބިތުކޮށްދިނުމަށް މަސައްކަތް ކުރަމުންކަން އެ ކުންފުނިން ފާހަގަކުރެއެވެ.
" މިފްކޯއިން އަބަދުވެސް މަސައްކަތް ކުރާނީ ދިވެހިރާއްޖޭގެ މަސްވެރިކަމުގެ ސިނާޢަތުގެ އެންމެ އިސްބާރަކަށް ވުމަށާއި، މުޖުތަމަޢު ބާރުވެރިކުރުވުމަށާއި، އަދި ދެމެހެއްޓެނިވި ގޮތަށް މަސައްކަތްކޮށް ކުރިއެރުން ހޯދައިގެން ހިއްސާދާރުންނަށް ފައިދާ ހޯދައިދިނުމަށެވެ."
މިފްކޯގެ އަހަރީ ޢާންމު ޖަލްސާ 2024 މިއަދު ބާއްވާފައިވާއިރު މި ޖަލްސާގައި ނިންމި ކަންކަމުގެ ތެރޭގައި، 2023 ވަނަ އަހަރުގެ އަހަރީ ޢާންމު ޖަލްސާގެ ޔައުމިއްޔާ ފާސްކުރުމާއި، 2024 ވަނަ އަހަރުގެ އަހަރީ ރިޕޯޓު ފާސްކުރުމާއި، 2024 ވަނަ އަހަރު ކުންފުނީގެ އޮޑިޓް ކޮށްފައިވާ މާލީ ބަޔާން ފާސްކުރުން ހިމެނެއެވެ. އަދި 2025 ވަނަ އަހަރަށް ކަނޑައަޅާ ކުންފުނީގެ އެކްސްޓާނަލް އޮޑިޓަރުގެ ގޮތުގައި ޑެލޮއިޓް ޕާޓްނަރސް ވަނީ ފާސްކޮށްފައެވެ.


