އިނގިރޭސި ޕްރިމިއަރ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުގައި ފަހަތުން އަރައި މެންޗެސްޓަރ ޔުނައިޓެޑުން 2-1 ގެ ނަތީޖާއަކުން މޮޅުވެއްޖެއެވެ. މި މެޗުގައި ޔުނައިޓެޑަށް ކާމިޔާބީ ހޯދައިދިނުމުގައި މުހިންމު ދައުރެއް އަދާކުރީ ދެވަނަ ހާފުގައި ގޯލު ޖެހި މޭސަން މައުންޓާއި ޖޯޝުއާ ޒިރްކްޒީއެވެ.

ސެލްހާސްޓް ޕާކްގައި ކުޅުނު މި މެޗުގައި ރޫބެން އަމޮރިމްގެ ޓީމަށް ކުޅުނު ޔުނައިޓެޑުން ނިކުތީ އަނިޔާގައި ތިބި އެޓޭކިން ދެ ކުޅުންތެރިން ކަމަށްވާ މެތިއުސް ކުންހާ އަދި ބެންޖަމިން ސެސްކޯ ނުލައެވެ. ނަމަވެސް، ބްރަޔަން އެމްބިއުމޯއާއެކު އެޓޭކިން ތިނެއްގައި ހިމެނުނު މައުންޓާއި ޒިރްކްޒީ ވަނީ މުހިންމު ދަނޑިވަޅުގައި ޓީމަށް ކާމިޔާބީ ހޯދައިދިނުމުގައި ބޮޑު ދައުރެއް އަދާކޮށްފައެވެ.

Ad by Hajj Corporation

ފުރަތަމަ ހާފުގައި މެޗުގެ 36 ވަނަ މިނެޓުގައި ލެނީ ޔޮރޯގެ ފައުލަކާ ގުޅިގެން ޕެނަލްޓީއަކުން ޖީން-ފިލިޕް މެޓޭޓާ ޕެލަސްއަށް ލީޑު ނަގައިދިނެވެ.

ޔުނައިޓެޑުން ނަތީޖާ ހަމަހަމަ ކުރީ ދެވަނަ ހާފުގެ ނުވަ ވަނަ މިނެޓުގައި ބްރޫނޯ ފެނާންޑޭޒް ނަގައިދިން ހިލޭ ޖެހުމަކުންނެވެ. ބްރޫނޯ ނަގައިދިން ބޯޅަ ޒިރްކްޒީ ކޮންޓްރޯލްކޮށް،ޑީން ހެންޑަސަން ކައިރިން ވަނީ ގޯލަށް ވައްދާލާފައެވެ. މިއީ ޕްރިމިއަރ ލީގުގައި ގޯލެއް ނުޖެހި 364 ދުވަސް ފަހުން ޒިރްކްޒީ ޖެހި ފުރަތަމަ ގޯލެވެ.

ޔުނައިޓެޑްގެ ކާމިޔާބީގެ ލަނޑު ޖެހީ އޭގެ ނުވަ މިނެޓު ފަހުން މޭސަން މައުންޓެވެ. ބްރޫނޯ ފެނާންޑޭޒް ނަގައިދިން ހިލޭ ޖެހުމެއް މައުންޓް ވަނީ ޕެލަސްގެ ޑިފެންސުން ހެދި ފާރުގެ ތެރެއިން ވަދެގެން ގޯލުގެ ކައިރީ ދަނޑި ކައިރިން ވައްދާލާފައެވެ.

މިމޮޅާއެކު ޔުނައިޓެޑް ވަނީ ކުޅުނު 13 މެޗުން ލިބުނު 21 ޕޮއިންޓާއެކު ތާޥަލުގެ 7 ވަނަ އަށް ޖެހިލާފައެވެ.