ސްރީލަންކާއަށް ކުރިމަތިވެފައިވާ މޫސުމީ ކާރިސާގައި އެގައުމުގެ ރައްޔިތުންނަށް އެހީތެރިކަން ފޯރުކޮށްދިނުމަށް ޕީއެސްއެމްއިން އިސްނަގައިގެން ރާއްޖޭގެ މީޑިޔާތަކާ ގުޅިގެން ކުރިއަށްގެންދާ ޓެލެތޯންއަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން 250،000 ރުފިޔާ ހަދިޔާކޮށްފިއެވެ. 

މިހާރު ކުރިއަށްދާ ޓެލެތޯންގެ ތެރެއިން، އެމްއޭސީއެލްއިން ހަދިޔާކުރި މި ފައިސާ ޕީއެސްއެމްއާ ހަވާލުކޮށްދިނީ އެމްއޭސީއެލްގެ ސީނިއާ މުވައްޒަފުންނެވެ.

Ad by Hajj Corporation

16 ގަޑިއިރަށް ކުރިއަށްގެންދާ މި ޓެލެތޯންގައި ސަރުކާރުގެ އެކި އިދާރާތަކާއި ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކުންވެސް އަންނަނީ އެހީތެރިކަން ފޯރުކޮށްދެމުންނެވެ.ރާއްޖޭގެ ކުންފުނިތަކުގައި ލަންކާއަށް ނިސްބަތްވާ މުވައްޒަފުންވެސް މަސައްކަތްކުރެއެވެ. އެހެންވެ އެ ކުންފުނިތަކުން މި ޓެލެތޯނުގައި ބައިވެރިވެ އެކުގައި މަސައްކަތް ކުރާ މުވައްޒަފުންނާއި ލަންކާގެ މި ހިތާމަވެރި ވަގުތުގައި ބައިވެރިވުމުގެ ގޮތުން ދަނީ އެހީތެރިކަން ފޯރުކޮށްދެމުންނެވެ.

ސިލޯނާއެކު ދިވެހީން ޓެލެތޯނަކީ ޕީއެސްއެމުން އިސް ނަގައިގެން ރާއްޖޭގެ ބައެއް މީޑިއާތަކާ ގުޅިގެން ކުރިއަށްގެންދާ ޓެލެތޯނެކެވެ. މި ޓެލެތޯނަށް އެކި ފަރާތްތަކުން ދަނީ އެހީތެރިކަން ފޯރުކޮށްދެއްވަމުންނެވެ.

ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް މިރޭ 7:30އާ ހަމައަށް 2.3 މިލިޔަނަށްވުރެ ގިނަ ރުފިޔާ ވަނީ ލިބިފައެވެ. އަދި ޑޮލަރު އެކައުންޓަށް ވަނީ 38 ހާހަށްވުރެ ގިނަ ޑޮލަރު ލިބިފައެވެ.