މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްގެ އެހީގައި، ހުޅުމާލެ، ހުރަވީ ސްކޫލުގައި ގާއިމުކުރި ވޮކޭޝަނަލް ހަބް، "ހުނަރު ވެހި" އިން ހިންގި، ފުރަތަމަ ދެ ކޯހުގެ ދަސްވެނިވުން ބާއްވައިފިއެވެ.

ހުރަވީ ސްކޫލުގައި އިއްޔެ ބޭއްވި ދަސްވެނިވުމުގެ ރަސްމިއްޔާތު ޝަރަފުވެރި ކޮށްދެއްވީ އެމްއޭސީއެލްގެ ބޯޑު މެމްބަރް އަދި ޗީފް ކޮމާޝަލް އޮފިސަރު (ސީީސީއޯ) މުހައްމަދު މިހާދުއެވެ.

Ad by Hajj Corporation

ދަސްވެނިވުމުގެ ރަސްމިއްޔާތުގައި ''ހުނަރު ވެހި'' އިން ހިންގި ފުރަތަމަ ދެ ކޯސް ކަމަށްވާ ނެޝަނަލް ސެޓްފިކެޓް ލެވެލް 3 އިން އިލެކްޓްރިކަލް އިންސްޓޮލޭޝަން އެންޑް މެއިންޓަނެންސް އަދި ނެޝަނަލް ސެޓްފިކެޓް ލެވެލް 3 އިން ފެޝަން ޑިޒައިން އެންޑް ޓެއިލަރިންގެ ތިން ބެޗަކުން 42 ދަރިވަރަކު ދަސްވެނިވިއެވެ.

މިކަމަށްޓަކައި ބޭއްވި ރަސްމިއްޔާތުގައި ވާހަކަދައްކަވަމުން އެމްއޭސީއެލްގެ ސީސީއޯ ވިދާޅުވީ، ދަރިވަރުންގެ ކިޔެވުމުގެ ތެރެއިން ދަސްކުރާ ހުނަރުތަކަކީ، އެ ދަރިވަރުންގެ މުސްތަގްބަލަށް މުހިންމު ފައިދާއެއް ކުރާނެ ކަންތައްތަކެއް ކަމަށެވެ. ހާއްސަގޮތެއްގައި ރާއްޖޭގެ ތަރައްގީއާއި ކުރިއެރުވމަށް ހުނަރުވެރި ދިވެހިން ބޭނުންވެފައިވާ މިފަދަ ދަނޑިވަޅެއްގައި، ތައުލީމީ ނިޒާމުގެ ތެރެއިން މިފަދަ ތަމްރީނު ދެވިގެން ދިއުމުގެ މުހިންމުކަން ސީސީއޯ މިހާދު ފާހަގަކުރެއްވިއެވެ.

މި ރަސްމިއްޔާތުގައި ވާހަކަދައްކަވަމުން ހުރަވީ ސްކޫލުގެ ޕްރިންސިޕަލް މުޙައްމަދު ހަލީމް ވަނީ، އެމްއޭސީއެލް އިން ހުނަރު ވެހި ތަރައްގީ ކޮށްދީ، ކޯސްތައް ކުރިއަށް ގެންދިއުމަށްޓަކައި ދެމުންގެންދާ އެހީތެރިކަން ފާހަގަކުރައްވައި ޝުކުރު ދަންނަވާފައެވެ.

އެމްއޭސީއެލްގެ އިޖުތިމާޢީ ޒިންމާގެ ދަށުން ހުރަވީ ސްކޫލްގައި ގާއިމްކުރި ''ހުނަރު ވެހި'' އަކީ ރާއްޖޭގެ ތައުލީމީ ނިޒާމު ކުރިއެރުވުމަށާއި އުފެއްދުންތެރި އަދި ބިނާކުރަނިވި ތަމްރީނުތައް ދަރިވަރުންނަށް އުނގަންނައި ދިނުމަށް މަގުފަހިކޮށްދިނުމުގެ ގޮތުން ކުރިއަށް ގެންދިޔަ މަޝްރޫޢެކެވެ.

މި މަޝްރޫޢުގެ ދަށުން، ހުނަރު ވެހިން ހިންގާ ކޯސްތަކަށް ބޭނުންވާ ސާމާނުތައް ވަނީ ހަދިޔާކޮށްފައެވެ. މިގޮތުން، ވަޑާންކުރުމަށާއި ކަރަންޓާއި ވަޔަރިން އަދި ވެލްޑިން ކުރުމަށް ބޭނުންވާ ސާމާނުގެ އިތުރުން ދަރިވަރުންނަށް ފަހަން ދަސްކޮށްދިނުމަށް ބޭނުންވާ ސާމާނުވެސް، އެމްއޭސީއެލް އިން ވަނީ ހަދިޔާކޮށްފައެވެ.

މީގެއިތުރުން، ހުނަރު ވެހި ތަރައްގީކޮށްފައިވާ އިމާރާތް މަރާމާތުކުރުމުގެ މަސައްކަތަށް ބޭނުންވާ ތަކެއްޗާއި އެހީތެރިކަން ވެސް ފޯރުކޮށްދީފައި ވަނީ އެމްއޭސީއެލް އިންނެވެ.