މި އަހަރުގެ ކްރޫޒްލައިނާ ސީޒަން މިދިޔަ އޮކްޓޫބަރުގައި ފެށުނު ފަހުން، މިއަދު މި ސީޒަންގެ ފުރަތަމަ ކްރޫޒްލައިނާއިން 1،045 ކުރޫއާއި ފަސިންޖަރުންނަށް އިމިގްރޭޝަނުން ކްލިއަރެންސް ދީފިއެވެ.

އިމިގްރޭޝަނުން ބުނީ، 'އަޒަމަރާ ޕާސުއިޓް'އިން އައި ފަތުރުވެރިންނަށް ސީޕޯޓް ޑިވިޝަންގެ އޮފިސަރުން ކާމިޔާބު ކަމާއެކީ ކްލިއަރެންސް ދީފައިވާ ކަމަށެވެ.އެ ކުރޫޒްލައިނާގައި ތިބީ 649 ފަސިންޖަރުންނާއި 396 ކްރޫއިންނެވެ.

Ad by Hajj Corporation

އިމިގްރޭޝަނުން ބުނި ގޮތުގައި، މި ކްރޫޒްލައިނާ ރާއްޖެއައީ، މޮރިޝަސްގެ ޕޯޓް ލުއީއިން ފުރައިގެނެވެ. އަދި، މިއީ، އެ ގައުމުން އައި ކްރޫޒްލައިނާއަކަށް ކްލިއަރެންސް ދިން ފުރަތަމަ ފަހަރު ކަމަށް އިމިގްރޭޝަނުން ބުނެފައިވެއެވެ.

މި ކްރޫޒް ޝިޕް ރާއްޖެ އައިސްފައި މިވަނީ ރާއްޖޭގެ ފަތުރުވެރިކަމުގެ ސިނާޢަތަށް ވަރަށް ބޮޑު ކުރިއެރުމެއް ލިބެމުންދާ ދަނޑިވަޅެއްގައި ކަން ފާހަގަ ކޮށްލެވެއެވެ. ފަތުރުވެރިކަމާ ބެހޭ ވުޒާރާއިން އެންމެ ފަހުން އާއްމުކޮށްފައިވާ ތަފާސްހިސާބުތައް ދައްކާގޮތުން މިހާތަނަށް ރާއްޖެއަށް 2.03 މިލިއަން ފަތުރުވެރިން ވަނީ އައިސްފައެވެ. އަދި މި މަހުގެ ފުރަތަމަ ދެ ދުވަހު 12،766 ފަތުުރުވެރިން ރާއްޖެއަށް އައިސްފައި ވެއެވެ.

ފަތުރުވެރިކަމާ ބެހޭ ވުޒާރާއިން ވިދާޅުވާ ގޮތުގައި މި އަހަރު ސަރުކާރުގެ އަމާޒަކީ ރާއްޖެއަށް 2.2 މިލިއަން ފަތުރުވެރިން ގެނައުމެވެ.