އިނގިރޭސިވިލާތުގެ ކިއުނާޑް ލައިން ކުންފުނީގެ ކުރޫޒްލައިން ކްއީން އޭން މިއަދު ރާއްޖެއަށް އަތުވެއްޖެއެވެ.

މި ކްރޫޒްލައިނުން ރާއްޖެއަށް 2،669 ފަތުރުވެރިން ވަނީ އައިސްފައެވެ. މިއީ، މި ކްރޫޒްލައިނަރ ރާއްޖެއަށް އައި ފުރަތަމަ ފަހަރެވެ.

އިނގިރޭސިވިލާތުގެ ކިއުނާޑް ލައިން ކުންފުންޏަކީ، ރާއްޖޭގެ ތާރީޚުގައި ފުރަތަމަ ފަހަރަށް ކްރޫޒްލައިނަރއެއް ގެނައި ކުންފުންޏެވެ. ކުއިން އޭން ރާއްޖެ ގެނެސްފައިވަނީ، ސުޕަ ޔޮޓުތަކާއި، ކްރޫޒްލައިނަރތައް ރާއްޖެ ގެންނަ މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް (މާޔާ) އިންނެވެ.

އެސިސްޓެންޓް އިމިގްރޭޝަން އޮފިސަރ ޙުސައިން ނިޔާޒު ވިދާޅުވީ، އިމިގްރޭޝަނުގެ މުވައްޒަފުން ސީޝެލްސްއަށް ގޮސް ކްރޫޒްލައިނަރއިން ދަތުރުކުރި ހުރިހައި ފަތުރުވެރިންނަށާއި ފަސިންޖަރުންނަށް ކްލިއަރެންސް ދީފައިވާ ކަމަށެވެ.

ކުއީން "އޭން" އަކީ، ދިގުމިނުގައި 323 މީޓަރު އަދި ފުޅާމިނުގައި 36 މީޓަރު ހުންނަ އުޅަނދެކެވެ. މި ކްރޫޒްލައިންގައި 14 ފަންގިފިލާ ހުރެއެވެ.

މި އުޅަނދުގައި ދުނިޔޭގެ އެކި ކަންކޮޅުތަކުގެ ކާބޯތަކެތި ލިބޭނެ 15 އަށްވުރެ ގިނަ ރެސްޓޯރެންޓް އާއި، ޚާއްޞަ ތިއޭޓަރެއް ވެސް ހުރެއެވެ. މި ތިއޭޓަރުގައި ފެންވަރު ރަނގަޅު ޝޯވތަކާއި، މިއުޒިކް އަދި ޑްރާމާތައް ކުރިއަށްދެއެވެ. މީގެ އިތުރުން އިޑްރޯތެރަޕީ ޕޫލްގެ އިތުރުން ޖިމް އަދި ފިޓްނަސް ސެންޓަރުތައްވެސް މި އުޅަނދުގައި ހުރެއެވެ.

ކްރޫޒްލައިނުން ރާއްޖެ އައި ފަތުރުވެރިން މިހާރު ވަނީ މާލެއަށް ފައިބާފައެވެ. މި ކްރޫޒްލައިން ރާއްޖެ އައިސްފައިވަނީ ސޭޝެލްސްއިންނެވެ. މި ކްރޫޒްލައިން ދެެން ދިއުމަށް ހަމަޖެހިފައިވަނީ، ސްރީލަންކާއަށެވެ.

Ad by Hajj Corporation

މިއީ، މިއަހަރު ރާއްޖެ އައި 5 ވަނަ ކްރޫޒްލައިނަރއެވެ. އާދިއްތަ ދުވަހުވެސް އިތުރު ކްރޫޒްލައިނަރއެއް ރާއްޖެ އައުމަށް ވަނީ ހަމަޖެހިފައެވެ.