ސްރީ ލަންކާ އަށް އެރި ތޫފާން ދީތުވާގެ ސަބަބުން ލިބުނު ގެއްލުންތަކާ ގުޅިގެން އެ ގައުމުގެ ރައްޔިތުންނަށް އެހީތެރިވުމަށް ދިވެހި ސަރުކާރުން ދޭން ނިންމި 25،000 މަސްދަޅު ކޭސް އެ ގައުމުގެ ސަރުކާރާ ރަސްމީކޮށް ހަވާލުކޮށްފިއެވެ.

މެންދުރަށް މައުލޫމާތުދެމުން އެމްއެސްއެސްއިން ބުނީ ހެނދުނު ބޯޓު ލަންކާއަށް ބަނދަރުކޮށްފައިވާއިރު މިއަދު މެންދުރު 1 ޖެހިއިރު ބޭއްވި ރަސްމިއްޔާތެއްގައި މަސްދަޅު ކޭސް ލަންކާ ސަރުކާރާ ރަސްމީކޮށް ހަވާލުކޮށްފައިވާކަމަށެވެ.

Ad by Hajj Corporation

މޯލްޑިވްސް ސްޓޭޓް ޝިޕިންގެ ގަލެނާ ކާގޯ ބޯޓުގައި މަސްދަޅުތައް ފޮނުވާފައިވަނީ 14 ކޮންޓެއިނަރުގައެވެ. 

ލަންކާއަށް އެހީތެރިވުމަށް ދިވެހި ސަރުކާރުން ދޭން ނިންމި 50،000 ޑޮލަރު ވެސް ލަންކާ ސަރުކާރާ ވަނީ ހަވާލުކޮށްފަ އެވެ. ލަންކާގެ ފޮރިން މިނިސްޓްރީގައި ބޭއްވި ހާއްސަ ރަސްމިއްޔާތެއްގައި އެ ފައިސާގެ އެހީ ލަންކާގެ ފޮރިން މިނިސްޓަރު ވިޖިތާ ހެރަތުއާ ހަވާލު ކޮށްދެއްވީ އެ ގައުމުގައި ހުންނަވާ ރާއްޖޭގެ ސަފީރު މަސްއޫދު އިމާދު އެވެ.

ލަންކާއަށް ކުރިމަތިވި ތޫފާނުގެ ސަބަބުން ބޯކޮށް ވާރޭވެހި ފެން ބޮޑުވުމާއި ބިންގަނޑު ކަނޑައިގެންދިއުމާ ގުޅިގެން ލަންކާގައި ހާލުގައި ޖެހިފައިވާ މީހުންނަށް އެހީވުމަށް ރާއްޖޭގެ މީޑިއާތަކުން ކުރިއަށްގެންދިޔަ "ސިލޯނާއެކު ދިވެހީން ޓެލެތޯނުން" 800،352 ޑޮލަރުވެސް ވަނީ ޖަމާކޮށް ހާރިޖިއްޔާއާ ހަވާލުކޮށްފައެވެ.