އަންނަ އަހަރު ފަގީރުންނަށް ޚާއްސަކޮށް "ޒަކާތު ބެނެފިޝަރީ ކާޑު" ތައާރަފުކުރުމަށްޓަކައި މިހާރުވެސް މަސައްކަތްތައް ކުރިއަށްދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މި ކާޑަކީ ފަގީރުންނަށް ޒަކާތުގެ އެހީ ފޯރުކޮށްދިނުމުގެ ނިޒާމު އިތުރަށް ފަސޭހަކޮށް، އެކި އިދާރާތަކަށް ދާންޖެހޭ މިންވަރު ކުޑަކުރުމަށްޓަކައި ތައާރަފުކުރާނެ ޑިޖިޓަލް ވަސީލަތެކެވެ.

Ad by Hajj Corporation

ދައުލަތުގެ މީޑިއާގައި ވާހަކަދައްކަވަމުން ޝަހީމް ވިދާޅުވެފައި ވަނީ މި ކާޑު ދޫކުރުމަށް ހަމަޖެހިފައިވަނީ ބޭންކް އޮފް މޯލްޑިވްސް (ބީއެމްއެލް) އާއި ޒަކާތު ހައުސް ގުޅިގެންނެވެ. މި ކާޑު ލިބޭނީ ހަމައެކަނި ފަގީރުންގެ ދަފުތަރުގައި ރަޖިސްޓްރީވެފައިވާ ފަރާތްތަކަށެވެ.

މިއީ ޒަކާތުގެ ފައިސާ ހައްގުވާ ފަރާތްތަކަށް އެހީ ދިނުމުގެ ކަންކަން ހަރުދަނާކޮށް، އެހީގެ ފައިސާގެ ބޭނުން އެންމެ އެކަށީގެންވާ ގޮތުގައި ހިފޭނެ މަގު ފަހިކޮށްދިނުމަށް އަޅާ މުހިންމު ފިޔަވަޅެކެވެ.

ޒަކާތު ބެނެފިޝަރީ ކާޑުގެ ޒަރިއްޔާއިން ޒަކާތު ހައުސްއިން ކަނޑައަޅާފައިވާ އެހީގެ ފައިސާ ކޮންމެ އަހަރަކުވެސް ފަސޭހަކަމާއެކު ޕޭ ކުރެވޭނެއެވެ. މި ކާޑު ބޭނުންކޮށްގެން، ކާޑު ބޭނުންކުރެވޭ ފިހާރަތަކުން ކާބޯތަކެތި ފަދަ ޒަރޫރީ ބޭނުންތައް ކާޑުގައިވާ ފައިސާގެ އަދަދުން ލިބޭނެއެވެ. މިސާލަކަށް، ކާޑު ބޭނުންކުރެވޭ ފިހާރައަކުން ކާބޯތަކެތި ފަދަ ޒަރޫރީ ބޭނުންތައް ފަސޭހަކަމާއެކު ހޯދުމުގެ ފުރުސަތު މި ކާޑުން ލިބިގެންދާނެއެވެ.

މި ކާޑު ތައާރަފުކުރުމުގެ މައިގަނޑު މަޤްޞަދަކީ ފަގީރުން އެކި އިދާރާތަކަށް ދާންޖެހޭ މިންވަރު ކުޑަކޮށް، އެހީ ދިނުމުގެ ކަންކަން ޒަމާނީކޮށް ފަސޭހަކޮށްދިނުމެވެ. މި މަސައްކަތް ކާމިޔާބުކަމާއެކު ކުރިއަށްގެންދެވިއްޖެނަމަ، އަންނަ އަހަރުގެ ތެރޭގައި ފަގީރުންގެ ދަފުތަރުގައިވާ ހުރިހާ ފަރާތްތަކަށް މި ކާޑުގެ ލާބަ ލިބިގެންދާނެ ކަމަށް ބެލެވެއެވެ.