ސްރީ ލަންކާ އަށް އެރި ތޫފާން ދިތުވާގެ ސަބަބުން ލިބުނު ގެއްލުންތަކާ ގުޅިގެން އެ ގައުމަށް އެހީވުމަށް ރާއްޖޭގެ ގައުމީ އެއާލައިން މޯލްޑިވިއަންއާއި، އަމިއްލަ 2 ޖަމިއްޔާއަކުން ގުޅިގެން އެގައުމަށް 3.8 ޓަނުގެ އަސާސީ އެހީ ފޮނުވުމަށް ނިންމައިފިއެެވެ.

މިކަން ހާމަކޮށް އެކުންފުނީގެ ސޯޝަލް މީޑިއާ އެކައުންޓުގައި ކުރި ޕޯސްޓެއްގައި ބުނީ މި އެހީ ފޮނުވުމުގައި އެ ކުންފުންޏާއެކު އެހީތެރިވަނީ މަހަލްދީބް ފައުންޑޭޝަންއާއި މީގާތު ހައްޖު އެންޑް އުމްރާ ގުރޫޕުކަމަށެވެ.

Ad by Hajj Corporation

މޯލްޑިވިއަނުން ބުނީ ޒަރޫރީ ބޭނުންތަކަށް ހަމަޖައްސާފައިވާ 3.8 ޓަނުގެ ތަކެތި އެ ގައުމަށް ގެންދިއުމަށް ހަމަޖެހިފައިވާ ކަމަށާއި މިތަކެތި ލަންކާއަށް ގެންދިއުމަށް މިއަދާއި އަންނަ އަންގާރަ ދުވަހު އެ އެއާލައިންގެ އޭ330 މަރުކާގެ އެންމެ ބޮޑެތި ބޯޓުގައި ލަންކާއަށް ހާއްސަ ދަތުރުތަކެއް ކުރުމަށްވެސް ނިންމާފައިވާކަމަށެވެ.

ލަންކާއަށް ކުރިމަތިވި މޫސުމީ ކާރިސާއިން އަރައިގަތުމަށް އެ ގައުމަށް އެންމެ ފުރަތަމަ އެހީވީ ރާއްޖެއިންނެވެ.

ރާއްޖެއިން އެގައުމަށް ދިން އެހީގެ އަދަދު 2.4 މިލިއަން ޑޮލަރަށްވުރެ ގިނައިރު މީގެ ތެރޭގައި ރާއްޖޭގެ މީޑިއާތަކުން ކުރިއަށްގެންދިޔަ "ސިލޯނާއެކު ދިވެހީން ޓެލެތޯނުން" ލިބުނު 800،352 ޑޮލަރާއި، ދިވެހި ސަރުކާރުން އެހީގެ ގޮތުގައި ދެއްވުމަށް ކަނޑައެޅުއްވި 50 ހާސް ޑޮލަރާއި، 25،000 ކޭސް މަސް ދަޅު ހިމެނެއެވެ.

މީގެ އިތުރުން ލަންކާގައި ދިރިއުޅޭ ދިވެހިންގެ ފަރާތުންވެސް އަންނަނީ ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދެމުންނެވެ.