ކުދި މަތިންދާބޯޓު ޖެއްސޭ ގޮތް ހަދައި، ރާއްޖޭގެ ދެކުނުގެ ހަތަރު އަތޮޅު ވައިގެ މަގުން މިއަދު ގުޅާލައިފިއެވެ.

ދެކުނުގެ ހަތަރު އަތޮޅު ކަމަށްވާ ގއ އަތޮޅު، ގދ އަތޮޅު، ފުވައްމުލަކު ސިޓީ އަދި އައްޑޫ ސިޓީ އެ އެއާލައިންގެ ދަތުރުތަކުން ވަނީ ގުޅާލާފައެވެ.އަދި އެ ދަތުރުތައް އަންނަ މަހު ފަށާނެ ކަމަށް ޤައުމީ އެއަރލައިން މޯލްޑިވިއަނުން ވަނީ ބުނެފައެވެ.

Ad by Hajj Corporation

ދެކުނުގެ ހަތަރު އަތޮޅު ރަސްމީކޮށް ގުޅާލުމުގެ މަޝްރޫއު ފެށީ އައްޑޫ ސިޓީ އެއާޕޯޓުގައި މިއަދު ހަވީރު ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ޓްރާންސްޕޯޓު މިނިސްޓަރު މުހައްމަދު އަމީންގެ އިތުރުން ބައެއް މިނިސްޓަރުންނާއި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ.

އެ ރަސްމިއްޔާތުގައި މި ދަތުރުތައް ފެށުމުގެ ހުއްދަ މޯލްޑިވިއަންއާ ހަވާލުކޮށްދެއްވީ ޓްރާންސްޕޯޓު މިނިސްޓަރު އަމީނެވެ. މޯލްޑިވިއަންގެ ފަރާތުން އެ ހުއްދައާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސްއެވެ.

ހަތަރު އަތޮޅުގެ މެދުގައި މި ދަތުރުތައް ކުރުމަށް ހަމަޖެހިފައިވަނީ މޯލްޑިވިއަންގެ ކުދި ބޯޓުތައް، އެއްގަމު ރަންވޭތަކަށް ޖެއްސޭހެން ހެދުމަށް ފަހެވެ.

މި ހަތަރު އަތޮޅުގެ 4 އެއާޕޯޓު ވައިގެ މަގުން އެއް އެއާޕޯޓު އަނެއް އެއާޕޯޓާއި ގުޅުވާލައި ދަތުރުތައް މިހާރު ފަށާފައިވާއިރު، މި ދަތުރުތަކަށް ބުކިން ހެދުމަށް މިހާރު ވަނީ ހުޅުވާލާފައެވެ. މޯލްޑިވިއަނުން ވަނީ، މި ދަތުރުތަކުގެ އަގުތައްވެސް ހާމަކޮށްފައެވެ.

މޯލްޑިވިއަނުން މި ދަތުރުތައް ކުރަން ހަމަޖެހިފައިވަނީ، 5 ސެކްޓަރ ނުވަތަ ރޫޓަށް ބަހާލައިގެންނެވެ. އެއީ، އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި ފުވައްމުލަކުން ކާޑެއްދޫ އަދި ކޫއްޑޫއަށް ދެވޭ ގޮތަށެވެ. ދަތުރުތަކަށް އަގުތައް ކަނޑައަޅާފައިވަނީ 500ރ އިން ފެށިގެންނެވެ.

މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައެވެ. މިއީ، 15 މީހުންގެ ޖާގައިގެ ކުދި ބޯޓުތަކެކެވެ.

މިއީ، ދެކުނުގެ އަތޮޅުތައް ގުޅުވާލުމަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ސަރަޙައްދީ ދަތުރުފަތުރު ހަރުދަނާ ކުރުމަށް ގެންގުޅޭ ސިޔާސަތާއި އެއްގޮތްވާ ގޮތުގެ މަތިން ފެށި މަސައްކަތެކެވެ. މިދަތުރުތަކާއެކު މި ސަރަޙައްދުގެ ވައިގެ އުދުހުންތަކުގެ ހަބަކަށް އައްޑޫ ގަން ވެގެންދާނެ ކަމަށް މޯލްޑިވިއަނުން ބުނެފައިވެއެވެ.

މި ދަތުރުތަކާއެކު މި ސަރަޙައްދުގެ ރަށްތަކުގައި ދިރިއުޅޭ ރައްޔިތުންނަށް ލުއިފަސޭހައެއް ލިބިގެންދާނެ ކަމަށާއި،އަދި އަމިއްލަ ދަތުރުތަކާއި، ތަޢުލީމާއި އެނޫންވެސް ޒަރޫރީ ބޭނުންތަކަށް މި އަތޮޅުތަކުގެ މެދުގައި ކުރާ ދަތުރުތަކަށް ފަސޭހަވާނެ ކަމަށް މޯލްޑިވިއަނުން ވަނީ ބުނެފައެެވެ..

މީގެ އިތުރުން ބޭސްފަރުވާއަށް ދަތުރުކުރާ ފަރާތްތަކަށް އައްޑޫ ގަން މެދުވެރިކޮށް ދަތުރު ކުރުމަށް މީގެ ސަބަބުން މަގުފަހިވެގެންދާނެ ކަމަށް ވެސް މޯލްޑިވިއަނުން ބުެނފަިވެއެވެ.