އުމްރާގެ އަޅުކަން އަދާކުރުމަށް ފުރަތަމަ ފަހަރަށް އައްޑޫން ސައުދީ އަރަބިއްޔާގެ ޖިއްދާއަށް ބާއްވާ މަތިންދާ ބޯޓު މިރޭ ފަތިހު ފުރުމަށް ނިންމައިފި އެވެ.

އުމްރާގެ އަޅުކަމަށް ފުރަތަމަ ފަހަރަށް އައްޑޫން ސީދާ ސައުދީއަށް ބާއްވާ ފްލައިޓު މިރޭ ފަތިހު ފުރާއިރު، މި ދަތުރަކީ އުމްރާގެ ދަތުރުގެ ހިދުމަތް ފޯރުކޮށްދޭ ޓްރެވެލް އެޖެންސީއެއް ކަމަށްވާ ދަ ޓްރެވެލާ އާއި ގައުމީ އެއާލައިން މޯލްޑިވިއަން ގުޅިގެން ބާއްވާ ފްލައިޓެކެވެ. މި ފްލައިޓުގައި ރާއްޖޭގެ ދެކުނުގެ ރަށްރަށުން ގިނަ ބަޔަކު އުމްރާގެ އަޅުކަމަށް ދާނެ ކަމަށް ދަ ޓްރެވެލާ އިން ހާމަކުރެއެވެ.

Ad by Hajj Corporation

ޓްރާންސްޕޯޓް މިނިސްޓަރު މުހައްމަދު އަމީން "އެކްސް" ގައި މިއަދު ކުރެއްވި ޕޯސްޓެއްގައި ވިދާޅުވީ އައްޑޫ ސިޓީގެ ގަމުން ސައުދީ އަރަބިއްޔާގެ ޖިއްދާއަށް ކުރުމަށް ހަމަޖެހިފައިވާ ދަތުރުގައި ބޭނުން ކުރާނީ ރާއްޖޭގެ ގައުމީ އެއާލައިން، މޯލްޑިވިއަންގެ އޭ330 މަތިންދާ ބޯޓު ކަމަށެވެ.

އަމީނު ވިދާޅުވި ގޮތުގައި މިދަތުރަކީ އައްޑޫއާއި ދެކުނުގެ އަތޮޅުތަކުގެ ރައްޔިތުންނަށް ލިބޭނެ ވަރަށް ބޮޑު ފަސޭހައެކެވެ. މިކަން ހަގީގަތަކަށް ހެދުމުގައި ރައީސް ޑރ. މުހައްމަދު މުއިއްޒުގެ ތަސައްވުރާއި ލީޑަޝިޕަށް އަމީން ވަނީ ޝުކުރު އަދާކުރައްވައިފަ އެވެ.

ގައުމީ އެއާލައިނުން ވަނީ ދެކުނުގެ ހަތަރު އަތޮޅުގެ މެދުގައި ވައިގެ ދަތުރުފަތުރު ކުރުމަށް ހާއްސަ ވިއުގައެއް ގާއިމުކޮށްފަ އެވެ. ސައުތު ކަނެކްޓިވިޓީ ނެޓްވޯކުގެ ނަމުގައި ގާއިމުކުރި މި ވިއުގައިގެ ތެރެއިން އައްޑޫއާއި ފުވައްމުލަކުގެ އިތުރުން ހުވަދު އަތޮޅު ހިމެނޭހެން ޝެޑިއުލުން ދަތުރުތައް ވަނީ ފަށާފަ އެވެ.