ރެއާލް މެޑްރިޑްގެ ކޯޗު ޒާބީ އަލޮންސޯގެ މަގާމު މާދަމާރޭ ޗެމްޕިއަންސް ލީގުގައި މެންޗެސްޓަރ ސިޓީއާ ދެކޮޅަށް ކުޅޭ މެޗުގެ ނަތީޖާއަށް ބިނާވާނެ ކަމަށް ރިޕޯޓްތައް ބުނެފިއެވެ. ސްޕެއިންގެ މަޝްހޫރު މީޑިއާތައް ކަމަށްވާ 'އެލް މުންޑޯ'، 'މާކާ' އަދި 'ދަ އެތުލެޓިކް' އިން ވަނީ އަލޮންސޯ ވަގުތުން ވަކިކުރުމާ ބެހޭ ގޮތުން މަޝްވަރާކުރުމަށް ކްލަބުން ހޯމަ ދުވަހު ކުއްލި ބައްދަލުވުމެއް ބާއްވާފައިވާކަން ކަށަވަރުކޮށްދީފައެވެ. ކްލަބުގެ އިސްވެރިންގެ މެދުގައި މިކަމާ ބެހޭ ގޮތުން ހިޔާލު ތަފާތުވުންތަކެއް ހުރި ނަމަވެސް، އަލޮންސޯއަށް ވަނީ އޭނާގެ މަގާމު ސަލާމަތްކުރުމަށް އެންމެ ފަހުގެ ފުރުސަތެއް ދީފައެވެ.

'ދަ އެތުލެޓިކް' އިން ބުނާ ގޮތުގައި އަލޮންސޯ މަގާމުން ވަކިކުރަން ގާތްވެފައި ވަނީ އޭނާއަށް ހައްލު ނުކުރެވުނު ތިން މުހިންމު މައްސަލައެއްގެ ސަބަބުންނެވެ. އެއީ: އަނިޔާގެ ސަބަބުން ދިފާއީ ލައިން ބަލިކަށިވުން، ޓީމުގެ ތެރޭގައި އަބަދުވެސް ހުންނަ އަޚްލާޤީ މައްސަލަތައް، އަދި ބައެއް ތަރި ކުޅުންތެރިން ޓީމުގެ އެއްބައިވަންތަކަމަށް ފުރިހަމައަށް ބައިވެރިނުވުމެވެ.

Ad by Hajj Corporation

ރެއާލް މެޑްރިޑްގެ ދިފާއީ މައްސަލަތައް އިތުރަށް ގޯސްވީ، ކްލަބުގެ އެންމެ މުހިންމު ދިފާއީ ކުޅުންތެރިޔާ ކަމަށް ސިފަކުރެވޭ އެޑާ މިލިޓާއޯއަށް، މިދިޔަ އާދީއްތަ ދުވަހު ސެލްޓާ ވިގޯއާ ދެކޮޅަށް ކުޅުނު މެޗުގައި 2-0 އިން ބަލިވި މެޗުގައި ހެމްސްޓްރިންގްގެ އަނިޔާއެއް ލިބުމުންނެވެ. މިލިޓާއޯގެ އިތުރުން ޓްރެންޓް އެލެގްޒެންޑަރ-އާނޯލްޑް، ޑެނީ ކާވްހާލް، ޑީން ހުއިސެން އަދި ޑޭވިޑް އަލާބާ ވެސް މިހާރު ތިބީ އަނިޔާގައި ކަމަށް ވުމުން، އަލޮންސޯއަށް ދިފާއީ ލައިނަށް ނެރެން ތިބި ކުޅުންތެރިން ވަނީ ވަރަށް މަދުވެފައެވެ.

މީގެ އިތުރުން ޓީމުގެ އަޚްލާޤީ މައްސަލަތައް ވެސް ވަނީ ބޮޑުވެފައެވެ. ވީނިސިއަސް ޖޫނިއަރ އޭނާ ބަދަލުކުރުމުން ދެއްކި ނުރުހުންތެރިކަމަށް އަދަބެއް ނުދިނުމަކީ، ޓީމުގެ ތެރޭގައި ފަރުވާކުޑަ ކަލްޗަރެއް އުފެދުމަށް މަގުފަހިކޮށްފައިވާ ކަމެއް ކަމަށް ބައެއް ފަރާތްތަކުން ވަނީ ފާޑުކިޔާފައެވެ. ސެލްޓާގެ ދެވަނަ ގޯލުގައި ފާހަގަވި ގޮތަށް، ޓީމުގެ ކުޅުންތެރިން ޕްރެސް ކުރުމުގެ ބަދަލުގައި ހިނގާލަ ހިނގާލާ ތިބުމުގެ އާދަ ވެސް ވަނީ ކަންބޮޑުވުން އުފައްދާފައެވެ.

މިކަންކަން އިތުރަށް ގޯސްކުރާ ކަމެއްގެ ގޮތުގައި، އަލޮންސޯ ކޯޗުކަމުގައި ހުރިހާ ހިނދަކު ވީނިސިއަސް ވަނީ އޭނާގެ ކޮންޓްރެކްޓް އާކުރުމާ ބެހޭ ގޮތުން މަޝްވަރާކުރުމަށް ދެކޮޅު ހަދާފައެވެ. މީގެ އިތުރުންވެސް ޒަބީ އެލަންސޯ ރެއާލްގެ ބައެއް ކުލުންތެރިން މެނޭޖްކުރަން ނޭނގޭކަމަށްބުނެ ކުލަބުގެ މެނޭޖްމަންޓުގެ ތެރޭގައި ވަނީ ހިޔާލުތަފާތުވުންތައް އުފެދިފައެވެ.

ރެއާލް މެޑްރިޑުން އަލޮންސޯ ވަކިކޮށްފިނަމަ، ވަގުތީ ކޯޗެއްގެ ގޮތުގައި ކްލަބުގެ ކުރީގެ ރައިޓް ބެކް އަދި މިހާރު ކަސްޓީލާގެ ކޯޗު އަލްވާރޯ އާބެލޯއާ ހަމަޖައްސާނެ ކަމަށް ބެލެވެއެވެ. އަދި ދިގު މުއްދަތަށް ކޯޗުކަމަށް ޒިނެދިން ޒިދާން ނުވަތަ ޔާގެން ކްލޮޕް ގެނައުމަށް ވެސް ކްލަބުން އަންނަނީ ބަލަމުންނެވެ.