ސިޔާސީ ޕާޓީތަކުން މެންބަރުކަމުން ވަކިވުމަށް އެދި އޮންލައިންކޮށް ހުށަހެޅޭނެ ގޮތް ހެދުމާއެކު ވަގަށް ޕާޓީތަކަށް ވެއްދުމަށް ހުރަސްއެޅިގެންދާނެކަމަށް އިލެކްޝަން ކޮމިޝަނުގެ ރައީސް ފުއާދު ތައުފީގު ވިދާޅުވެއްޖެއެވެ.

"މެންދުރު އޮންލައިން" އިން ކުރި ސުވާލަކަށް ދެއްވި ޖަވާބުގައި ފުއާދު ވިދާޅުވީ މިގޮތަށް ހެދުމުގެ ސަބަބުން ޕާޓީއަށް ވަދެވޭނީވެސް އަދި ޕާޓީން ވަކިވެވޭނީވެސް އަމިއްލައަށް ނުވަތަ ސީދާ އިލެކްޝަން ކޮމިޝަނުގެ ބެލުމުގެ ދަށުންކަމަށެވެ.

Ad by Hajj Corporation

ޕާޓީން ވަކިވުމަށް އެދޭ ހިސާބުން ކޮމިޝަނުން އެ ފޯމެއް ވެރިފައިކޮށް ރަޖިސްޓްރީވެފައިވާ ސިޔާސީ ޕާޓީއަކަށް އަންގާނެކަމަށާއި އެހެންކަމުން މިއީ ރައްޔިތުންގެ މެދުގައި އިތުބާރު ހިފޭ އުސޫލަކަށް ވާނެކަމަށް ޤަބޫލުފުޅުކުރައްވާކަމަށް ފުއާދު ވިދާޅުވިއެވެ.

އެ ކޮމިޝަނުން ބަލަހައްޓާ ސިޔާސީ ޕާޓީތަކުގެ މެންބަރުންގެ ދަފުތަރުން ވަކިވުމަށް އެދި އޮންލައިންކޮށް ހުށަހެޅޭނެ އިންތިޒާމު މިހާރު ހަމަޖައްސާފައިވާއިރު މި އިންތިޒާމުގެ ދަށުން އެކަމަށް ޚާއްޞަކޮށްފައިވާ ޕޯޓަލް މެދުވެރިކޮށް ސިޔާސީ ޕާޓީތަކުގެ މެންބަރުންގެ ދަފުތަރުން ވަކިވުމަށް އެދި ހުށަހެޅޭނެއެވެ.

ސިޔާސީ ޕާޓީތަކުގެ މެންބަރުންގެ ދަފުތަރުން ވަކިވުމަށް އެދި ހުށަހެޅޭ އިސީގެ އޮންލައިން ޕޯޓަލްގެ ލިންކް އެކޮމިޝަންގެ ވެބްސައިޓް އިން ފެންނާނެއެވެ.

އެ ޕޯޓަލްގެ "ސިޔާސީ ޕާޓީތައް" ކެޓަގަރީއަށް ފިތުމުން "ސިޔާސީ ޕާޓީއަކުން ވަކިވުމަށް" ފެންނަ ގޮތަށް ވަނީ ހަދާފައެވެ. އަދި އެތަނަށް ފިތުމުން ޕާޓީން ވަކިވުމަށް އެދި ހުށަހަޅަންޖެހޭ ފޯމުތަކާއި ލިޔެކިޔުންތައް ފެންނަން ހުންނާނެއެވެ.