މާލޭގެ ރައްޔިތުންނަށް ދެން ދިމާވެފައިވާ އެންމެ ބޮޑު ކަންބޮޑުވުމަކީ ބުޅަލުގެ މައްސަލަކަމަށާއި ނޮވެމްބަރުމަހުގެ ތެރޭގައި މިކަމަށް ހައްލު ހޯއްދަވައިދެއްވާނެކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެއެވެ.

މަރާމާތަށް ފަހު މާލޭގެ އާސަހަރާ މިސްކިތާއި އާ ސަހަރާ މިއަދު ހުޅުވާލަފައިވާއިރު އެ ސަރަހައްދުގައި ހުންނަވައި "މެންދުރު އޮންލައިން" އަށް ދެއްވި އިންޓަވިއުއެއްގައި މޭޔަރު ވިދާޅުވީ

ހުޅުމާލޭގައި މިހާރު ހެދުމުގެ މަސައްކަތް ކުރަމުން އަންނަ ބުޅާ ފެސިލީޓިގެ މަސައްކަތްތައް ނޮވެމްބަރުމަހަށް ނިންމާލައި ބޭނުންކުރަން ފެށޭނެކަމަށެވެ.

"ކުލިނިކް ބައި މިހާރު ނިމިފައި އެހުރީ. އެކަމަކު ވަރަށް ބައިވަރު ބުޅަލުގެ ވާހަކަ މިދައްކަނީ. އަންދާޒާ މިކުރެވެނީ 2،000 ނުވަތަ 3،000 އެއްހާ ބުޅާ އެބަ އުޅެއޭ މާލެ، ހުޅުމާލެ އަދި ވިލިމާލޭގައި. މިއީ ވަރަށް ހަރަދު ހިނގާނެ ކަމެއް. އެހެންވެ މިހާރު ސަރުކާރުގައިވެސް އެދެފިން މިކަމަށް ކޮންމެވެސް ވަރެއްގެ ބަޖެޓެއް ދެއްވުމަށް. މައްސަލައަކީ ރައްޔިތުންގެ ކަންބޮޑުވުން އޮތް މައްސަލައަކަށްވާތީ ބަޖެޓަށްވެސް މި އެދުނީ" މޭޔަރު އާޒިމް

މާލޭގެ މަގުތަކުގައި ގިނަވަމުންދާ ބުޅާތައް ގެންގުޅޭނެ 'ޕެޓް ކެއަރ ފެސިލިޓީ' ގާއިމުކުރުމުގެ ޕްރޮޖެކްޓަކީ މާލެސިޓީ ކައުންސިލާއި މިނިސްޓްރީ އޮފް އެގްރިކަލްޗާރ އެންޑް އެނިމަލް ވެލްފެއާރއިން ކުރިއަށް ގެންދާ ޕްރޮޖެކްޓެކެވެ.ބުޅާ ފެސިލިޓީގެ ސަބަބުން މާލެ ސަރަހައްދުގެ ޕާކުތަކާއި މަގުމަތީގަ އާއި އަދި އެ ނޫންވެސް ޢާންމުން އެއްވެ އުޅޭ ސަރަހައްދުތަކުގައި އުޅޭ ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި މާހައުލެއް ޤާއިމުކުރެވި އާންމު ތަންތަނުގައި ބުޅާ ގިނަވުމުގެ ސަބަބުން ފެތުރިދާނެ ބަލިތަކުން މުޖުތަމައު ސަލާމަތްކުރެވޭނެކަމަށް ކައުންސިލުން މައުލޫމާތުދެއެވެ.

މިތަނުން ބުޅާތަކަށް ފެންވަރު ރަނގަޅު ޞިއްޙީ ފަރުވާގެ ނިޒާމެއް ލިބިގެންދާއިރު ފެސިލިޓީ އެޅުމަށް ހުޅުމާލޭ ދެވަނަ ފިޔަވަހިން 5،000 އަކަފޫޓުގެ ބިމެއްވަނީ ދޫކޮށްފައެވެ.