ޅަ އުމުރުފުރާތަކުގެ ކުދިންގެ ދިވެހިބަހުގެ ފެންވަރު ރަނގަޅުކުރަން މިހާތަނަށް އެކަށީގެންވާ މަސައްކަތްތަކެއް ކުރެވިފައި ނުވާކަމަށް ތައުލީމާބެހޭ ވަޒީރު، ޑރ. އިސްމާޢީލް ޝަފީޢު ވިދާޅުވެއްޖެއެވެ.

ތުއްތު ކުދިންގެ ދިވެހިބަހުގެ ހުނަރު ތަރައްގީކުރުމަށް ފެށި "ނެޝަނަލް އަރލީ ލަރނިންގ ޕްރޮގްރާމް" ފެށުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައި ވަޒީރު ވިދާޅުވީ، ތުއްތު ކުދިންގެ ދިވެހި ބަހުން ވާހަކަދެއްކުމާއި ލިޔެކިއުމުގެ ފެނވަރު ދަށްވާ ވާހަކައަކީ އަބަދުވެސް ދެކެވޭ ވާހަކައެއް ނަމަވެސް މިކަން ހައްލުކުރަން އެދެވޭ މަސައްކަތެއް ނުކުރެވިއޮތްކަމީ ހިތާމަހުރި ކަމެއް ކަމަށެވެ.

Ad by Hajj Corporation

ލޭންޖުއޭޖް ޑީވެލޮޕްމަންޓުގެ އެކި ފިޔަވަހިތަކަށް ބަލާއިރު އެންމެ މުހިންމު އެއް އުމުރުފުރާއަކީ ޕްރައިމަރީ އުމުރުފުރާ ނަމަވެސް އެކުދިންގެ އުމުރުފުރައަށް ހާއްސަ އޯޑިއޯ/ވިޝުއަލް ފޮތްތަކާއި، ފިލްމުތައްފަދަ ތަަކެތި ބާޒާރުގައި ނެތްކަން ފާހަގަކުރައްވާ، ވަޒީރު ވިދާޅުވީ އެކުދިންގެ ދިވެހި ބަހުގެ ފެންވަރު މަތިކުރުމަށްޓަކައި ދިވެހި ބަސް އުނގަންނައިދިނުމުގެ ވަސީލަތްތައް ތަރައްގީކުރަންޖެހޭ ކަމަށެވެ.

ރާއްޖޭގައި މިފަދަ ވަސީލަތްތައް ތަރައްގީކުރެވޭނެ ގާބިލު ބޭފުޅުން ރާއްޖޭގައި އެބަ ތިއްބެވިކަން ފާހަގަކުރައްވާ، ވަޒީރު ވަނީ މިފަދަ ބޭފުޅުން ވުޒާރާގެ މި މަސައްކަތުގައި ބައިވެރިވެވަޑައިގެން، ރަނގަޅު ކޮންޓެންޓުތަކެއް އުފެއްދުމަކީ މުހިންމު ކަމެއްކަން ފާހަގަކުރައްވާފައެވެ. އަދި މިދާއިރާއަކީ ދިވެހި ކުންފުނިތަކުން ވުނަކުރުން މުހިންމު ދާއިރާއެއްކަމަށް ވަޒީރު ވިދާޅުވިއެވެ.

ތައުލީމީ ވުޒާރާގެ ކޯޕަރޭޓިވް ސޯޝަލް ރެސްޕޮންސިބިލިޓީ (ސީ.އެސް.އާރު) ޕްރޮގްރާމަކީ ބޯއިންގްގެ އެހީތެރިކަމާއެކު ރޫމްޓުރީޑްއިން، ދިވެހިރާއްޖޭގެ ނޭޝަނަލް އިންސްޓިޓިއުޓް އޮފް އެޑިޔުކޭޝަން (އެން.އައި.އީ) އާ ގުޅިގެން ކުރިއަށްގެންދާ މަސައްކަތެކެވެ. މި ޕްރޮގްރާމުގެ ދަށުން، ދިވެހި ބަހުން ކިޔެވުމާއި ޕްރައިމަރީ ތައުލީމު ހަރުދަނާކުރުމަށްޓަކައި، ދިވެހި ބަހަށް ފައްތާފައިވާ ކުޑަކުދިންގެ ފޮތްތަކެއް ޕްރިންޓުކޮށް، ޑިޖިޓައިޒްކޮށް، އަދި ގައުމީ ފެންވަރުގައި ހުރިހާ ޕްރައިމަރީ ސްކޫލްތަކަށް ވަނީ ބަހާފައެވެ. ދިވެހި ބަހުން ލިޔެފައިވާ 15 ފޮތެއްވަނީ ލޯންޗުކޮށްފައެވެ.