މޯލްޑިވްސް ހައްޖު ކޯޕަރޭޝަންގެ ހައްޖާއި އުމްރާގެ ކަންކަން ހަރުދަނާކުރުމަށް ސައުދީ އަރަބިއްޔާގެ އަލް ސަފްވާ ފައުންޑޭޝަނާއިއެކު އެއްބަސްވުމެއްގައި ސޮއިކޮށްފިއެވެ.

ހައްޖު ކޯޕަރޭޝަނުން ވިދާޅުވީ އެ ފަހުމްނާމާގައި ސޮއިކުރުން ކުރިއަށްދިޔައީ ހައްޖު އުމްރާ ކޮންފަރެންސް އެންޑް އެގްޒިބިޝަން 1447 ގެ ތެރެއިން ކަމަށެވެ.

Ad by Hajj Corporation

މިއީ ހައްޖާއި އުމްރާގެ ކަންކަމުގައި އެ ކޯޕަރޭޝަނަށް އަލް-ސަފްވާ ފައުންޑޭޝަނުން އެހީތެރިކަން ފޯރުކޮށްދިނުމާއި، މުވައްޒަފުން ހިލޭ ތަމްރީން ކުރުމާއި ބިނާކުރުމަށް އެހީތެރިކަން ފޯރުކޮށްދިނުމަށް ވެވުނު އެއްބަސްވުމެއް ކަމަށް ވެސް ވިދާޅުވިއެވެ.

އެ އެއްބަސްވުމުގައި އެ ކޯޕަރޭޝަންގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ޝަކީލެވެ. އަދި އަލް-ސަފްވާ ފައުންޑޭޝަންގެ ފަރާތުން ސޮއިކުރެއްވީ އެފައުންޑޭޝަންގެ ޗީފް އެގްޒެކެޓިވް އޮފިސަރު އަބްދުﷲ މުހައްމަދު އަލް-ހަޖޫރީއެވެ.

ދިވެހިރާއްޖޭގައި ބާއްވާ ދެވަނަ ހައްޖު އުމްރާ ކޮންފަރެންސް އެންޑް އެގްޒިބިޝަން ފެށީ މިއަދުއެވެ. އިސްލާމީ މަރުކަޒުގެ ޖަލްސާކުރާ މާލަމުގައި މިއަދު 17:00 އާ ހަމަޔަށް ކުރިޔަށްދާ މި ކޮންފަރެންސް ފައްޓަވައިދެއްވީ ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނެވި ސަފީރު ޔަހްޔާ ހަސަން އަލް ގަހުތާނީ އާއި އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދުއެވެ.

މި ކޮންފަރެންސްގައި ސައުދީއަރަބިއްޔާގެ އައްސަފްވާ ފައުންޑޭޝަނުގެ ވަފުދެއް ބައިވެރިވެވަޑައިގެންނެވިއެވެ. މިއީ ސައުދީގެ މަޝްހޫރު އައްރާޖިހީ ބޭންކުގެ ދަށުން ދީނީ އަދި ދަރުމަވެރި މަސައްކަތްތައް ހިންގާ އެ ކުންފުނީގެ ދީނީ ގޮތްޕެކެވެ.