އެކި ސަބަބުތަކާހުރެ 1447 ވަނަ އަހަރުގެ ރަމަޟާން މަހު، ޢުމްރާގެ އަޅުކަމަށް ނުފުރި ތިބި ފަރާތްތަކަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ޚާއްޞަ އިންތިޒާމުތަކެއް ހަމަޖެއްސުމުގެ މަސައްކަތް މޯލްޑިވްސް ޙައްޖު ކޯޕަރޭޝަނުން ފަށައިފިއެވެ.

ޙައްޖު ކޯޕަރޭޝަނުން ނެރުނު ނޫސްބަޔާނެއްގައި ވަނީ އެކި ގްރޫޕްތަކުގެ ޙަވާލުގައި ރަމަޟާން ޢުމްރާއަށް ދިއުމަށް ނިންމާފައިވަނިކޮށް، ފްލައިޓުތައް ކެންސަލްވުމާއި، އެނޫންވެސް ދަތިތަކާއިހުރެ ފުރޭގޮތް ނުވެފައިވާ ފަރާތްތަކަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ޙައްޖު ކޯޕަރޭޝަނުން ޚާއްޞަ އިންތިޒާމުތަކެއް ހަމަޖެއްސުމުގެ މަސައްކަތް ކުރަމުންދާކަމަށެވެ. އަދި މިކަމަށްޓަކައި ފްލައިޓު ޗާޓަރު ކުރެވޭގޮތް ވެއްޖެނަމަ އެކަން ކުރުމާއި، އެ ކޮމޮޑޭޝަން ހަމަޖެއްސުމަށް މި ކޯޕަރޭޝަނުން މަސައްކަތްތަކެއް ކުރަމުންދާކަމަށް ނޫސްބަޔާނުގައި ވެއެވެ.

Ad by Hajj Corporation

އެހެންކަމުން މި ރަމަޟާން މަހު ޢުމްރާގެ އަޅުކަން އަދާކުރުމަށް އެދި، ދިމާވި އެކި ސަބަބުތަކާހުރެ ނުފުރި ތިބި ފަރާތްތަކުގެތެރެއިން މި ފުރުޞަތުގެ ބޭނުން ހިފަން ބޭނުންވާ ފަރާތްތަކުން މާދަމާ މެންދުރު 12:00ގެ ކުރިން އީމެއިލް އެޑްރެސް sales@mhcl.mv އަށް މަޢުލޫމާތު ފޮނުވުމަށްވެސް ޙައްޖު ކޯޕަރޭޝަނުގެ ނޫސްބަޔާނުގައިވެއެވެ.

އެކި ކުންފުނިތަކުން އުމްރާއަށް ދިއުމަށް އުޅުނު ފަރާތްތަކަށް ނުފުރިފައިވުމާއި ބައެއް ޤައުމުތަށް މެދުވެރިކޮށް ޓްރާންސިޓްކޮށް ފުރަން އުޅުނު ފަރާތްތަކަށް، އެޤައުމުތަކުގެ ޕްލައިޓްތައް ކެންސަލްވުމުން ނުފުރިފަ ތިބި ފަރާތްތައް ޢުމްރާއަށް ފުރުވޭނެ ގޮތެއް ހޯދުމަށް ޢިއްޒަތްތެރި ރައީސުލްޖުމުހޫރިއްޔާ އިރުޝާދު ދެއްވާފައިވުމާއެކު، ފުރޭނެ ގޮތެއް ހޯދުމުގެ މަސައްކަތް މިނިސްޓްރީއާއި މޯލްޑިވްސް ޙައްޖު ކޯޕަރޭޝަނާއި މޯލްޑިވިއަން ގުޅިގެން ފަށާފައިވާ ވާހަކަ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުވެސް ވަނީ ހާމަކުރައްވާފައެވެ.

މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ވަނީ ފާހަގަކުރެވިފައިކަމަށާއި، ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގައެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެކަމަށް ވަޒީރު ވިދާޅުވިއެވެ.  ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާކަމަށްވެސް ވަޒީރު ވިދާޅުވިއެވެ.

ރައްޔިތުންނާ ގުޅުން ހުރި މިފަދަ  ކަންކަން ހައްލުކޮށްދެއްވުމަށް ރައީސް ޑރ މުޢިއްޒު ބަހައްޓަވަމުން ގެންދަވާ އަހައްމިއްޔަތަށްޓަކައި ވަރަށް އިޚްލާޞްތެރިކަމާއެކު ވަޒީރު ވަނީ ރައީސަށް ޝުކުރު އަދާކުރައްވާފައެވެ. މިފަދަ ކޮންމެ ކަމެއްގައިވެސް ދިވެހިރައްޔިތުންނަށް ދެއްވާ އެހީތެރިކަން ފާހަގަކުރައްވައި ދަތުރުގެ ޚަރަދު ކުރާނީ އެހެންޏާ ވެސް ޢުމްރާ ދަތުރުގައި އޮންނަ އުޞޫލުން ޢުމްރާވެރިންކަމަށްވެސް ވަޒީރު ވަނީ ވިދާޅުވެފައެވެ.