ދިވެހިރާއްޖޭގެ ތާރީޚުގައި ހިންގާ ސިޓީ ތަރައްޤީކުރުމުގެ އެންމެ ބޮޑު މަޝްރޫޢު ކަމުގައިވާ ރަސްމާލެ މަޝްރޫޢަކީ، މާލެއިން ގާތްގަނޑަކަށް 10 ކިލޯ މީޓަރު ދުރުގައި، 1153 ހެކްޓަރުގެ ބޮޑު ސިޓީއެއް ތަރައްގީކުރުމަށް ފަށާފައިވާ މަޝްރޫޢުއެކެވެ. މި ސިޓީގެ ބޮޑުމިން ވަނީ ހުޅުމާލޭގެ ތިން ފޭސްގެ ޖުމްލަ ސަރަހައްދަށްވުރެ ގާތްގަނޑަކަށް ތިން ގުނަ އިތުރުކަމަށް ލަފާކުރެވިފައެވެ. މި ސިޓީ އަށް އަމާޒުކޮށްފައިވާ އާބާދީއަކީ 65,000 އެވެ. އަދި 200,000 އަށްވުރެ ގިނަ ހައުސިން ޔުނިޓް ތަރައްގީކުރުމަކީ ސަރުކާރުގެ އަމާޒެވެ.

މި ސިޓީ ތަރައްގީކުރަން ނިންމާފައި ވަނީ ''މޯލްޑިވްސް އިކޯ-ސިޓީ'' ޒީރޯ-ކާބަން ރައްކާތެރި ރަށެއްގެ ކޮންސެޕްޓަށެވެ. މިފަދަ ބޮޑު ސިޓީއެއް ދެމެހެއްޓެނިވިގޮތެއްގައި ހިންގުމަށްޓަކައި، މާލެ އާއި ރަސްމާލެއާ ދެމެދު ހައި-ފްރިކުއެންސީ އަދި މޫސުން ރަނގަޅުނޫން ދުވަސްދުވަހުވެސް ދަތުރުކުރެވޭނެ ގޮތެއް ގުޅުވާލެވުމުން މުޅިން ބިނާވެފައި ވަނީ މާލެ/ރަސްމާލެ ދަތުރުފަތުރުގެ މާސްޓަރ ޕްލޭނާއެވެ.

Ad by Hajj Corporation

މި މަޝްރޫޢުއާއި ގުޅިގެން އެންމެބޭނުންވާ އެއްކަމަކީ މާލެއާއި ރަސްމާލެ ދަތުރުފަތުރުން ގުޅުވާލުމެވެ. ދަތުރުފަތުރުގެ ފަސޭހަކަން ގާއިމުވެފައި އޮތުމެވެ. އެންމެ ޒަމާނީ ސިޓީގައި ދިރިއުޅުމަކީ ގިނަ ބަޔެއްގެ އުންމީދަކަށް މިކަން ވާނެކަން ގައިމެވެ. އެ ސިޓީން ވެރިރަށް މާލެ އަށް ދަތުރުކުރެވޭނެ ލުއިމަގެއް އޮތުމަކީ ވެސް އެ ރައްޔިތުން ނުހަނު ބޭނުންވާނެ ކަމެކެވެ. ދިވެހިރާއްޖޭގެ ތަރައްގީގެ މުޅިން އައު ބާބެއް ހުޅުވާލާނެ މި މަޝްރޫޢު ކާމިޔާބުވާނެކަމާމެދު ދާއިރާގެ ތަޖުރިބާކާރުން ސުވާލެއް ނުއުފައްދަވައެވެ. އެ ބޭފުޅުންގެ ނަޒަރުގައި މާލެ އާއި ރަސްމާލެ ގުޅުވާލުމުގައި ތަފާތުގޮތްތައް ބޭނުންކުރެވިދާނެއެވެ. އެ ގޮތްތަކުގެ ކާމިޔާބީއާއި އެގޮތްތައް ކާމިޔާބުކުރުމުގައި ފުރުސަތުގެ ބޮޑުމިނާއި ގޮންޖެހުންތައް ވެސް އެބޭފުޅުން ފާހަގަކުރަށްވައެވެ. ހަމައެހެންމެ ރަސްމާލޭގެ އެތެރޭގެ ދަތުރުފަތުރުގެ ލުއިކަމަށް ވެސް އެބޭފުޅުން ތަފާތު ކޮންސެޕްޓްތައް ގެންނަވައެވެ. މީގެ ތެރެއިން މި ރިޕޯޓުގައި މި ބަލައިލަނީ ތަޖުރިބާކާރުންގެ ނަޒަރިއްޔާތުން މާލެއާއި ރަސްމާލެ ގުޅުވާލުމުގެ ބައިގެ ކޮންސެޕްޓްތަކުގެ މައްޗަށެވެ.

މާލެ-ރަސްމާލެ އާއި ދެމެދު ދަތުރުފަތުރުގެ ނިޒާމު

ރަސްމާލެ އާއި މާލެއާ ދެމެދު ގާތްގަނޑަކަށް 10 ކިލޯ މީޓަރު ރާސްތާއެއް ހުރުމުން، ކޮންމެ ދުވަހަކު އެތައް ބަޔަކު ދަތުރުފަތުރުކުރުމުގެ ގާބިލުކަން ހުންނަ ނިޒާމެއް ބޭނުންވާނެއެވެ. ފުރަތަމަ ކަމެއްގެ ގޮތުގައި ފެނުއަޑިން ދަތުރުކުރާ ރޭލު އެޅުމަށް ހުށަހަޅާފައިވީނަމަވެސް، ތަޖުރިބާކާރުންގެ ފަންނީ ދިރާސާތަކުން ދައްކާގޮތުން މިގޮތައް ކަންތައް ކުރުމުގައި މާކަނޑުގެ ތެރޭގައި އެންޖިނިއަރިންގޮތުން ގިނަ ގޮންޖެހުންތަކެއް ހުރެދާނެއެވެ. އެހެންކަމުން މިކަން އެހެން ފިޔަވައްސަކަށް ގެންގޮސް، ފަށައިގަތުމުގައި، ހައި-ސްޕީޑް ފެރީ ޓްރާންސިޓް (އާރުއެފްޓީ) އަށް (ހައިޑްރޯފޮއިލް އުޅަނދު) އިސްކަންދީ، އަދި ފިކްސްޑް-ލިންކް ޓެކްނޮލޮޖީތައް ބެލެހެއްޓުމަށް މުހިންމުކަމަށް ތަޖުރިބާކާރުން ވަނީ ލަފާދެއްވާފައެވެ.

ރަސްމާލެ ތެރޭގައި، ޒީރޯ-ކާބަން އިލެކްޓްރިކް ޓްރާންސިޓް އަދި ފުޅާދާއިރާއެއްގައި ހިންގާ އެކްޓިވް މޮބިލިޓީ ނެޓްވޯކްތައް ބޭނުންކޮށްގެން ''15 މިނިޓް ސިޓީ''އެއްގެ ގޮތުގައި ތަރައްޤީކުރުން ރަނގަޅުކަމަށް ފެންނަކަމަށް ތަޖުރިބާކާރުން ލަފާދެއްވައެވެ.

ރަސްމާލެ އާއި މާލެއާ ދެމެދު ގުޅުވުމަށް މައިގަނޑު ތިން ގޮތެއް ތަޖުރިބާކާރުން ވަނީ ކިޔައިދެއްވާފައެވެ. އެގޮތްތަކަށް ބަލާއިރު،

ފުރަތަމަ ގޮތް

ސަބްމަރޖްޑް ފްލޯޓިން ޓަނަލް (ފެނުއަޑީގެ ރޭލު)މިއީ ފެނުއަޑީގައި ހުންނަ ޓަނަލެއް ކަނޑު އަޑީގައި ބަނދެފައި ނުވަތަ ކަނޑު އަޑީގެ ވަކިފުންމިނެއްގެ މަތީ ހިފެހެއްޓިފައި ހުންނަގޮތަށް އޮންނަ، ފަތުރުވެރިންނަށް މޫދު މަންޒަރު ފެންނަގޮތަށް ހެދޭ ޓަނަލެކެވެ. ސަރުކާރުން ވަނީ މިކަން ޢިއުލާންކޮށް މިހާރު ޢަމަލީ ދިރާސާތައް ފަށާފައެވެ.

ދެވަނަ ގޮތް

ހައި-ސްޕީޑް ރެޕިޑް ފެރީ ޓްރާންސިޓް - (އާރުއެފްޓީ) (ވަގުތުން ހައްލެއްގެ ގޮތުގައި ހުށަހަޅާ ހިޔާލު)މެޓްރޯ ސްޓައިލް ތާވަލަކަށް (10-15 މިނެޓުން ފުރާގޮތަށް) ހިނގާ، ޒަމާނީ، ހަމަޖެހޭ ކަޓަމަރަން ނުވަތަ ހައިޑްރޯފޮއިލް ފެރީގެ ފްލީޓެއް ހިންގުމަކީ ޓެކްނިކަލީ ކުރެވޭނެ މިންވަރު މަތި ކަމެކެވެ.

ދިވެހިރާއްޖޭގައި މިހާރު ވެސް އާރުޓީއެލް ފެރީގެ ޚިދުމަތް ކާމިޔާބުކަމާއެކު ދެވެމުން އަންނައިރު، ރަސްމާލެއަށް ފަށާ ހައިޑްރޯފޮއިލް ފެރީގެ ފްލީޓްގެ ޚިދުމަތް، އުޅަނދުތަކުގެ ބޮޑުމިނާއި ދަތުރުތަކުގެ މިންވަރު އާބާދީ އަށް ބަލައި އިތުރުކުރަމުން ގެންދެވިދާނެއެވެ. އެއިރުން މާލެ އާއި ރަސްމާލެއާ ދެމެދު ހޭދަވާނީ ގާތްގަނޑަކަށް 17-20 މިނިޓެވެ. މިއީ މާލީގޮތުން ވެސް ކުރެވޭނެ މިންވަރު މަތިކަމެކެވެ.

ތިންވަނަ ގޮތް

ކަނޑުމަތިން އަޅާ ބްރިޖެއްގެ މަޝްރޫޢު ތިލަމާލެ ބްރިޖް ކޮންސެޕްޓާއި ގުޅުވައިގެން ފުޅާކުރެވިދާނެއެވެ. މެދުފެންވަރަކުން ކުރެވިދާނެ މިކަމަށް އޮތް ހުރަހަކަށްވެދާނެ ކަމަކީ އެއީ 10 ކިލޯ މީޓަރަށްވުރެ ދިގު ރާސްތާއަކަށްވުމެވެ.

ސްޓްރެޓީޖިކް ލަފާ

ރަސްމާލެ އާއި މާލެ އާ ދެމެދު ދަތުރުފަތުރަށް ތަޖުރިބާކާރުން ދިން އިސްތިރާޖީ ލަފައަކީ، ފުރަތަމަ މަރުހަލާ (2025-2030) އަށް، މައިގަނޑު ދަތުރުފަތުރުގެ ވަސީލަތެއްގެ ގޮތުގައި ހައި-ސްޕީޑް ފެރީ ބޭނުންކުރުން އިސްކުރުމެވެ. ދެވަނަ މަރުހަލާއަކަށްޓަކައި ދާއިމީ ގުޅުމެއް (ޓަނަލެއް ނުވަތަ ބްރިޖެއް) ގާއިމުކުރުމުގެ ރިސާޗް އެންޑް ޑިވެލޮޕްމަންޓް ކުރިއަށް ގެންދިޔުމަށް ތަޖުރިބާކާރުން އިރުސާދުދެއެވެ. ނަމަވެސް ފުރަތަމަ މަރުހަލާގެ ބޯހިޔާވަހިކަން މި ދާއިމީ ގުޅުމަށް ބަރޯސާކޮށްގެން ނުވާނެކަމަށް ތަޖުރިބާކާރުން ބުނެއެވެ.

ރަސްމާލެ- ކާމިޔާބު ވާނެ ތަސައްވުރެއް

ތަޖުރިބާކާރުން ދެކޭގޮތުގައި ސަރުކާރުގެ ތަސައްވުރާއެއްގޮތައް ރަސްމާލެއަކީ ކާމިޔާބު ކުރެވޭނެ މަޝްރޫޢުއެކެވެ. އަދި އެއީ ދިވެހިރާއްޖޭގެ ތަރައްގީއަށް މުޅިން އައު އިންގިލާބެއް ގެނުވާނެ މަޝްރޫޢުއެއްކަމަށް ވެސް ތަޖުރިބާކާރުން ދެކެއެވެ. މި މަޝްރޫޢު ހިންގުމުގައި ސަރުކާރުން އެކަށައަޅާފައިވާ ޕްލޭންތަކަކީ ދުރުރާސްތާ ކާމިޔާބީގެ މައްޗަށް އެކުލެވިގެންވާ ފުރިހަމަކަން އައުމަށް ވަގުތާއި ފައިސާ ބޭނުންވާކަމެއްކަމަށް ތަޖުރިބާކާރުން ދެކެއެވެ. އަދި ކައިރި މުސްތަގުބަލުގެ ލަނޑުދަނޑި ހާސިލްކުރުމަށް ސަރުކާރުން އެކަށަހަޅާފައިވާ ގޮތްތަކާއި، އެކަންކަމަށް ފައިސާ ހޯދާނެމަގުތަކަށް ބަލާއިރު، މި މަޝްރޫޢު ކާމިޔާބުވާނެކަމާމެދު ތަޖުރިބާކާރުން ޝައްކެތް ނުކުރެއެވެ.

ރަސްމާލެ- ބޯހިޔާވަހިކަމުގެ އިޖުތިމާއީ މައްސަލައިގެ ހައްލު

މާލޭގެ އެންމެ ބޮޑު މައްސަލައަކީ ގޯތިގެދޮރުގެ މައްސަލަ ކަމުގައިވާތީ، އެންމެ ކައިރިން ހިއްކެން އޮތް ބޮޑު ފަޅަކީ ފުށިދިއްގަރުފަޅު ކަމުން، އެތަން ރަސްމާލެ ޑިވެލޮޕްމެންޓްގެ ގޮތުގައި މިހާރު ދަނީ ހިއްކަމުންނެވެ. އެތަނުން 1,000 ހެކްޓަރަށްވުރެ ގިނަ ބިން ހިއްކެމުންދާއިރު، ފުރަތަމަ 15,000 ގޯތި (1,250 އަކަފޫޓުގެ) ދޭނެއެވެ. އޭގެތެރެއިން 10,000 ގޯތި މާލޭގެ ރަށްވެހިންނަށް ކަނޑައަޅާފައިވާއިރު، 3,000 ގޯތި މާލޭގައި ދިރިއުޅޭތާ ގިނަދުވަސްވީ ރައްޔިތުންނަށް، އަދި 1,500 ގޯތި ކުދި ބިންތައް ހުރި ފަރާތްތަކުން މުޅި ގޯތި އެކީގައި ދޫކޮށްލާފައި، ކޮންމެ މީހަކަށް ގޯއްޗެއް ލިބޭގޮތަށް ކަނޑައަޅާފައިވެއެވެ. މައިމުޅަ ވެފައިވާ ފަރާތްތަކަށް ވަކި ކެޓެގަރީއެއް ހުންނާނެއެވެ. ރަސްމާލެ ހިއްކުމުގެ މަސައްކަތް ކުރިއަށް އޮތް 4-5 މަސް ތެރޭގައި ނިންމާލެވޭނެ ކަމަށް ރައީސް ޑރ. މުޙައްމަދު މުޢިއްޒު ވަނީ ވިދާޅުވެފައެވެ.