ޔަހޫދީންގެ ހަމަލާއެއްގައި ފަލަސްތީނުގެ މިނިވަންކަމަށް ޖިހާދުކުރާ ހަމާސް ޖަމާއަތުގެ އިސް ކޮމާންޑަރެއް ކަމުގައިވާ ރާއިދު ސަޢަދު ޝަހީދު ކޮށްލައިފިއެވެ.

އާދިއްތަ ދުވަހު ނެރުނު ވީޑިއޯ ބަޔާނެއްގައި ސައުދު ޝަހީދުކޮށްލިކަން ކަށަވަރުކޮށްދެއްވަމުން، ހަމާސްގެ އިސްވެރިޔާ ޚަލީލް އަލް-ޙައްޔާ ވަނީ އިސްރާއީލުން ހަނގުރާމަ ހުއްޓާލުމުގެ އެއްބަސްވުމާއި ޚިލާފުވެފައިވާކަމަށް ވިދާޅުވެފައެވެ.

Ad by Hajj Corporation

މި ދަނޑިވަޅުގައި ސުލްހައިގެ އެއްބަސްވުމަށް އަމަލުކުރުމަށް ޔަހޫދީންގެ މައްޗަށް މަޖުބޫރު ކުރުވުމަށް ޚަލީލް އަލް-ޙައްޔާ ވަނީ ޔަހޫދީންގެ އެންމެ ބޮޑު މަދަދުގާރު އެމެރިކާގެ ރައީސް ޑޮނަލްޑް ޓްރަމްޕްއަށް ވެސް ގޮވާލައްވާފައެވެ.

ރާއިދު ސަޢަދު ޝަހީދު ކޮށްލާފައިވަނީ ޣައްޒާއަށް ދީފައިވާ ވައިގެ ހަމަލާތަކެއްގައެވެ. މި ހަމަލާތަކުގައި ރާއިދު ސަޢަދުގެ އިތުރުންވެސް ހަތަރު މީހަކުވަނީ ޝަހީދުވެފައެވެ. އަދި 25 މީހަކަށް އެކިވަރުގެ ޒަހަމްތައް ލިބިފައިވާކަމަށް ރިޕޯޓުކޮށްފައިވެއެވެ.

ހަމާސްއާއި ޔަހޫދީންނާ ދެމެދު ހަމަލާ ބަދަލު ކުރުން މެދުކަނޑައިލުމަށް އެއްބަސްވެ، އެ އެއްބަސްވުމަށް އަމަލު ކުރަން ފެށިފަހުން އެއްބަސްވުމާ ތަކުރާރުކޮށް ހިލާފުވެ 386 މީހުން ޔަހޫދީން ވަނީ ޝަހީދުކޮށްލާފައެވެ.